कोवाड येथे एटीएम फोडून १९ लाख लंपास

 

कोवाड / वार्ताहर  

गॅस कटरच्या सहाय्याने एटीएम फोडून  चोरट्यांनी १८ लाख ७७ हजार ३०० रुपयांची रोकड लंपास केली. ओवाळ येथील स्टेट बँकेच्या एटीएम सेंटरमध्ये शनिवारी मध्यरात्रीच्या सुमारास ही घटना घडली. पोलिसांनी चोरट्यांचा पाठलाग करण्याचा प्रयत्न केला, मात्र नाकाबंदीसाठी असणाऱ्या पोलिसांच्या वाहनास धडक देऊन चोरटे पसार झाले. काही अंतरावरच पोलिसांना चोरट्यांचे चार चाकी वाहन आणि गॅस कटर मिळून आले. याबाबतची फिर्याद बँकेचे शाखाधिकारी आशिष हरिषचंद्र रोकडे (रा. नेसरी, ता. गडहिंग्लज) यांनी चंदगड पोलिसांत दिली आहे.

शनिवारी सायंकाळी ७.३० ते रविवारी पहाटे पावणे एकच्या दरम्यान चोरट्यांनी गॅस कटरच्या साह्याने बँकेचे एटीएम फोडून रक्कम लांबविली.

त्यामुळे कोवाड परिसरात एकच खळबळ उडाली. रोकड घेऊन चोरटे पळून जात असल्याची माहिती पोलिसांना मिळाली. हा प्रकार ई- सर्व्हिसमुळे जिल्हा पोलीस विभागाला समजतात गडहिंग्लजचे उपविभागीय पोलीस अधिकारी रामदास इंगवले यांनी चंदगडचे पोलीस निरीक्षक विश्वास पाटील व नेसरी पोलीस स्थानकाला अलर्ट केले. त्यानंतर पाटील यांनी यंत्रणे सह चोरट्यांचा पाठलाग केला. त्याचवेळी नेसरी पोलिसांनी मुख्य चौकात नाकाबंदी केली. पण कार भरधाव असल्याने बॅरिकेड्स तोडून चोरट्याने कारसह हेब्बाळच्या दिशेने पोबारा केला. दरम्यान, कार पोलिसांच्या व्हॅनला धडकली. त्यात टायर व एअर बॅग फुटल्याने कार हेब्बाळमध्येच सोडून रक्कम घेऊन चोरट्यांनी पळ काढला. पोलिसांनी कार ताब्यात घेतली असून कोवाड, नेसरी, हेब्बाळमधील सीसीटीव्हीचे फुटेज तपासले. यावरून पोलिसांनी विविध पथके तयार करून तपासाला गती दिली आहे. चंदगड पोलीस स्थानकाचे पोलीस नाईक, बी.ए.चौगुले  यांनी गुन्हा नोंद करून उपनिरीक्षक डोंबे हे तपास करीत आहेत.