• अनेकजण अडकल्याची शक्यता 

बेळगाव / प्रतिनिधी 

बेळगाव तालुक्यातील नावगे गावाच्या हद्दीतील स्नेहम टिको टेप निर्मिती कारखान्याला मंगळवारी रात्रीच्या अचानक आग लागली असून कारखान्यात अनेकजण अडकल्याची शक्यता आहे. आगीत संपूर्ण कारखाना जळून खाक झाला आहे.

कारखान्यामध्ये मोठ्या प्रमाणात प्लास्टिक असल्याने आग पसरली. आग लागली त्यावेळी ६० हून अधिक जण आत असल्याची माहिती प्राप्त झाली आहे. कारखान्याच्या लिफ्टजवळ ८ ते १० कामगार होते. पाच जणांना तातडीने बाहेर काढण्यात आले. अजून बरेच जणआत असल्याचे समजते. स्नेहम कारखान्यात प्रत्येकी तीन शिफ्टमध्ये ७४ कामगार काम करत होते. आगीने थैमान घातले, तेव्हा अनेकांना बाहेर काढण्यासाठी धडपड सुरू होती. माहिती मिळताच अग्निशमन दलाचे जवान घटनास्थळी दाखल झाले. 

आग एवढी भीषण आहे की अग्निशमन दलाला बचाव कार्यात अडथळे येत आहेत. तरीही पोलीस, ग्रामस्थ आणि अग्निशमन दलाच्या जवानांचे आग विझवण्यासाठी प्रयत्न सुरू आहेत. आग लागण्याचे नेमके कारण समजू शकलेले नाही.

दरम्यान घटनेची माहिती मिळताच जिल्हाधिकारी मोहम्मद रोशन आणि बेळगाव ग्रामीण पोलिसांनी घटनास्थळी भेट दिली. यावेळी जिल्हाधिकारी मोहम्मद रोशन म्हणाले, या दुर्घटनेतील जखमींवर उपचारासाठी जिल्हा रुग्णालयात २०० खाटांची तयारी करण्यात आली आहे.