• दुध दरकपात अन् सबसिडी वाढविण्याची मागणी 

 

बेळगाव / प्रतिनिधी 

दुधाची दरवाढ कमी करून दुधाच्या सबसिडीत ५ ते १० रुपयांनी वाढ करावी अशी मागणी करत बेळगावात भाजपतर्फे राज्य काँग्रेस सरकारच्या विरोधात निदर्शने करण्यात आली. सोमवारी बेळगाव जिल्हाधिकारी कार्यालयासमोर भाजप पदाधिकारी व कार्यकर्त्यांनी एकत्र येत सरकारविरोधात जोरदार घोषणाबाजी करत आपला संताप व्यक्त केला.

- या बातमीचा व्हिडिओ पाहण्यासाठी खाली क्लिक करा.. 👇

यावेळी बेळगाव ग्रामीण भाजपचे जिल्हाध्यक्ष सुभाष पाटील म्हणाले, कर्नाटकातील काँग्रेस सरकारने दुधाच्या सबसिडीत ५ रुपयांनी वाढ करण्याचे आश्वासन दिले होते. मात्र  गेल्या ८ महिन्यांपासून राज्य सरकारने दुग्धोत्पादक शेतकऱ्यांना कोणतीही सबसिडी (अनुदान) दिलेले नाही. तेव्हा दुधाचे दर कमी करून सबसिडीत ५ ते १० रुपये वाढवा. हमीभावासाठी दरवाढीचे धोरण अवलंबून राज्य सरकार सर्वसामान्यांवर बोजा टाकत आहे. दुधाची दरवाढ कमी न केल्यास  तीव्र संघर्ष करण्याचा इशारा त्यांनी दिला.

याप्रसंगी ग्रामीण भाजपचे माजी जिल्हाध्यक्ष तथा माजी आमदार संजय पाटील यांनी हमीभावाच्या नावाखाली सत्तेवर आलेल्या सरकारने आता जनतेवर बोजा टाकला आहे. मुख्यमंत्री - उपमुख्यमंत्री बदलाच्या गप्पा मारताना सरकारला सर्वसामान्यांची चिंता करायला वेळ नाही. विकासाचा विसर पडला आहे. मुख्यमंत्री सिद्धरामय्या हे पूर्वीसारखे राहिले नाहीत. राज्यातील जनतेवर सरकारचा अन्याय वाढला आहे. ही दरवाढ कमी करावी किंवा जागा रिकामी करावी, अशी मागणी त्यांनी केली . 

यावेळी आंदोलनात बेळगाव महानगर अध्यक्षा गीता सुतार, संतोष हडपद, लीना टोपण्णावर आदि पदाधिकारी व कार्यकर्ते सहभागी झाले होते.