बेळगाव / प्रतिनिधी 

बेळगावातील चन्नम्मा सर्कल येथे भाजपच्या कार्यकर्त्यांनी राज्य सरकारच्या पेट्रोल आणि डिझेलच्या दरवाढीचा निषेध करत विविध पद्धतीने निदर्शने केली.यावेळी आमदार अभय पाटील यांनी दुचाकी बैलाला बांधून अनोख्या पद्धतीने राज्य सरकारचा निषेध केला.

याप्रसंगी प्रसारमाध्यमांशी बोलताना राज्यसभा सदस्य इराण्णा कडाडी म्हणाले, काँग्रेस पक्ष हतबल आहे. सरकार बेजबाबदारपणे चालवत आहे, काँग्रेस सरकार सत्तेत आल्यापासून दरवाढ करत आहे, नरेंद्र मोदी यांनी नोव्हेंबर महिन्यात पेट्रोलचे दर ५ रुपयांनी कमी केले होते, तर बोम्मई सरकारमध्ये ७ रुपयांनी कपात केली होती. काँग्रेस केंद्र सरकारवर सेस दर कमी करत नसल्याचा खोटा आरोप करत असल्याचे सांगून त्यांनी मुख्यमंत्री सिद्धरामय्या यांच्यावर संताप व्यक्त केला.

सरकारने राज्यातील जनतेला हमीभाव योजना दिल्या आहेत. त्यासाठी पैसा बाजूला न ठेवता,  तुम्ही लोकांकडून पैसे गोळा करायला सुरुवात केली हा तुमच्या सरकारच्या बेजबाबदारपणाचा आरसा आहे. वीजेचे दर, निवेशनची खरेदी किंमत, व्यावसायिक इमारतींचे दर, भाजीपाला, दूध या सर्वांमध्ये वाढ करण्यात आल्याचा संताप त्यांनी व्यक्त केला. 

या आंदोलनात माजी आमदार महादेवप्पा यादवाड, भाजपचे राज्य उपाध्यक्ष अनिल बेनके, माजी विधानपरिषद सदस्य महांतेश कवठगीमठ, राज्यसभा सदस्य इराण्णा कडाडी, ग्रामीण भाजपचे जिल्हाध्यक्ष सुभाष पाटील, लीना टोपण्णावर यांच्यासह कार्यकर्ते व पदाधिकाऱ्यांचा सहभागी झाले होते.  

या बातमीचा व्हिडीओ पाहण्यासाठी खाली क्लिक करा 👇