• खानापूर तालुका समितीचीचे कारवार जिल्हाधिकाऱ्यांना निवेदन 

खानापूर / प्रतिनिधी 

कारवार लोकसभा मतदार संघात मराठी भाषिकांची संख्या मोठ्या प्रमाणात आहे. त्यामुळे मतपत्रिकेवर पेपरवर मराठीतून नावे समाविष्ट करावी तसेच माहिती आणि मतदार यादी मराठी भाषेतून उपलब्ध करून द्यावी अशी मागणी खानापूर तालुका महाराष्ट्र एकीकरण समितीच्यावतीने कारवारच्या जिल्हाधिकारी गंगुबाई मानकर यांच्याकडे निवेदनाद्वारे करण्यात आली आहे. 

कारवार लोकसभा मतदार संघातील खानापूर, हल्याळ, जोयडा व कारवार भागात मराठा समाज व मराठी भाषिकांची संख्या मोठ्या प्रमाणात आहे. तसेच कोंकणी भाषिक देखिल अधिक संख्येने आहेत . या सर्वांच्या सोयीसाठी निवडणूक प्रक्रियेवेळी मतपत्रिकेवर फक्त कन्नड व इंग्रजीतून नावे न देता मराठी भाषेतूनही नावे द्यावीत तसेच  मराठी भाषेतून माहिती आणि मतदार यादी उपलब्ध करून द्यावी त्यामुळे मराठी भाषिकांची गैरसोय होणार नाही असे निवेदनात नमूद करण्यात आले आहे. 

यावेळी जिल्हाधिकारी मानकर यांनी तुम्ही उशिरा मागणी केली आहे. तरीही याबाबत निवडणूक विभागाला माहिती देऊन मराठीतूनही माहिती उपलब्ध करून देण्यासाठी प्रयत्न करेन असे आश्वासन दिले. खानापूर समितीचे कार्याध्यक्ष निरंजन सरदेसाई, रमेश धबाले, मुकुंद पाटील, अभिजित सरदेसाई, संदेश कोडचवाडकर आदी उपस्थित होते.