• हुक्केरी वनविभागाची कारवाई : दोघांवर गुन्हा दाखल

हुक्केरी / वार्ताहर 

गुडस (ता. हुक्केरी जि. बेळगाव) येथे चंदनाच्या लाकडाच्या अवैध वाहतुकीवर छापा टाकून वाहतुकीसाठी वापरलेल्या कारसह ४ लाख रुपये किमतीचे ४० किलो चंदन, ४ लाख रुपये किमतीचे मौल्यवान साहित्य असा एकूण ८ लाख रुपये किमतीचा मुद्देमाल जप्त केला. सोमवारी सायंकाळी एका कारमध्ये चंदनाची अवैध वाहतूक होत असल्याची खात्रीलायक माहिती मिळाल्याने हुक्केरी वनविभागाचे अधिकारी व कर्मचाऱ्यांच्या विशेष पथकाने ही कारवाई केली. या प्रकरणी पुंडलिक बजंत्री आणि परसप्पा बजंत्री (दोघेही रा. खंडाळा ता. रायबाग, जि. बेळगाव) यांच्यावर गुन्हा दाखल करण्यात आला आहे. 

या कारवाईत मुख्य वनसंरक्षक मंजुनाथ चव्हाण यांच्या मार्गदर्शनाखाली उपवनसंरक्षक एस.एस.कल्लोळीकर, सहायक वनसंरक्षक शिवरुद्रप्पा कबाडगी, प्रादेशिक वनपरिक्षेत्र अधिकारी प्रसन्न बेल्लद, उपविभागीय वनअधिकारी विष्णुकुमार नाईक, गस्ती वनपाल रायप्पा बबली व कर्मचाऱ्यांनी भाग घेतला होता. 

कारवाई दरम्यान कार सोडून पळून गेलेल्या आरोपींचा शोध घेण्यासाठी पोलिसांनी सापळा रचला आहे. याप्रकरणी प्रादेशिक वनीकरण विभागात गुन्हा दाखल करण्यात आला असून तपास सुरू आहे. या प्रकरणातील आरोपी हे बनावट पत्रकार असल्याची माहिती प्राप्त झाली असून त्यांनी पत्रकारांच्या वेशात चंदनाच्या लाकडाची वाहतूक करण्याचा प्रयत्न केल्याचे सांगण्यात येत आहे.