खानापूर / प्रतिनिधी 

बीई इंजिनियरिंगच्या पहिल्या वर्गात शिक्षण घेत असलेल्या एका विद्यार्थ्याने राहत्या घरी गळफास घेऊन आत्महत्या केली. लक्ष्मीनगर खानापूर येथे मंगळवार दि. ६ फेब्रुवारी दुपारी १२ च्या सुमारास ही घटना उघडकीस आली. मंथन अशोक वड्डीन्नावर (वय १९) असे आत्महत्या केलेल्या विद्यार्थ्याचे नाव आहे. मंथनची आई हारूरी येथील मराठी शाळेत शिक्षिका आहे.

याबाबत प्राप्त माहितीनुसार लक्ष्मीनगर खानापूर येथील रहिवासी व यडोगा (ता. खानापूर) येथील मराठी शाळेतील कन्नड शिक्षक अशोक वड्डीन्नावर यांचा धाकटा मुलगा बेळगाव येथील बीई इंजिनियरिंगच्या पहिल्या वर्गात शिक्षण घेत असून उद्यापासून त्याची परीक्षा सुरू होणार होती. नेहमीप्रमाणे आज दुपारी मंथन आणि त्याचा मोठा भाऊ घरामध्ये स्वतःच्या खोलीत अभ्यास करत बसले होते. थोड्यावेळानंतर मंथनचा मित्र त्याला भेटण्यासाठी आला.  यावेळी मंथनचा भाऊ मंथनला बोलावण्यासाठी त्याच्या खोलीत गेला असता, मंथन गळफास घेतलेल्या स्थितीत आढळून आला. त्यानंतर मंथनाच्या मोठ्या भावाने सर्वांना माहिती दिली. 

घटनेची माहिती मिळताच खानापूर तालुक्याचे माजी आमदार व बेळगाव जिल्हा मध्यवर्ती सहकारी बँकेचे संचालक अरविंद पाटील यांनी तातडीने घटनास्थळी दाखल होऊन पोलिसांना कल्पना दिली. तसेच मृतदेह शवविच्छेदनासाठी खानापूर येथील सरकारी आरोग्यकेंद्रात दाखल केला. यावेळी खानापूर तालुका पंचायतचे माजी उपसभापती व वननिगमचे माजी राज्य संचालक सुरेश देसाई व माजी तालुका पंचायत सदस्य अशोक देसाई माजी आमदार अरविंद पाटील सोबत उपस्थित होते.