• वनविभागाच्या अधिकाऱ्यांची कारवाई 

खानापूर / प्रतिनिधी 

एका मोठ्या कारवाईत वाघिणीची शिकार करणाऱ्या कुख्यात चिका उर्फ कृष्णा पाटेपवार याला बेळगाव वनविभागाच्या अधिकाऱ्यांनी अटक केली आहे. यावर्षी जुलै महिन्यात बेळगाव विभागातील खानापूर तालुक्याच्या स्थानिक जळगा झोनमध्ये चंदनाची झाडे चोरीला गेली होती. या प्रकरणाची गांभीर्याने दखल घेत, खानापूर उपविभागाच्या वनाधिकाऱ्यांनी आरोपीचा शोध घेण्यासाठी सापळा रचला होता. काही दिवसांपूर्वी बेळगाव शहरातील कणबर्गी नजीक कालखंड गावाजवळ आरोपी लपून बसला असल्याची खात्रीलायक माहिती मिळाली. त्या माहितीच्या आधारे खानापूर विभागीय अधिकारी व कर्मचाऱ्यांच्या पथकाने एका मंडपावर धाड घालून मंडपातून चंदनाचे तुकडे व धारदार शस्त्रे जप्त करून एकाला अटक करण्यात आली.

खानापूर उपविभागीय सहाय्यक वनसंरक्षक डॉ. संतोष चव्हाण यांच्या नेतृत्वाखालील पथकाने ताब्यात घेतलेला हा आरोपी मध्य प्रदेशातील असल्याचा संशय व्यक्त करून त्याची सखोल चौकशी केली. या ताब्यात घेण्यात आलेल्या व्यक्तीचे नाव शिका उर्फ कृष्णा पाटेपवार असे असून तो  मध्य प्रदेशातील दामो जिल्ह्याचा रहिवासी आहे.

या आरोपीने यापूर्वीही महाराष्ट्र राज्यातील अमरावती जिल्ह्याच्या मेळघाट जंगलात वाघ आणि अस्वलांचे शिकार केली असून काही वर्षांपूर्वी मृत्यू झालेला कुख्यात वाघ शिकारी संसाचंद टोळीचा सदस्य असल्याची माहिती आहे.

कारवाई केल्याबद्दल बेळगाव परिमंडळाचे मुख्य वनसंरक्षक मंजुनाथ चव्हाण यांच्या मार्गदर्शनाखाली बेळगाव विभागाचे उपवनसंरक्षक शंकर कल्लोळकर, खानापूर उपविभागाचे सहाय्यक वनसंरक्षक संतोष चव्हाण, नागराज बलेहोसूर प्रादेशिक व वनपरिक्षेत्राचे अधिकारी व कर्मचारी तसेच विभागाच्या वरिष्ठ अधिकाऱ्यांचे कौतुक होत आहे.