• शमी-बुमराहचा भेदक मारा 
  • इंग्लंडचे विश्वचषकातील आव्हान संपुष्टात

लखनौ : भारत आणि इंग्लंड यांच्यातील विश्वचषकाच्या २९व्या सामन्यात टीम इंडियाच्या गोलंदाजांनी इंग्लंडला चारीमुंड्या चीत करत सलग सहाव्या विजयाची नोंद केली. लखनौच्या इकाना स्टेडिअमवर भारताने इंग्लंडचा १०० धावांनी पराभव केला. भारताने २२९ धावांच्या माफक आव्हानाचा यशस्वी बचाव केला. इंग्लंडचा संपूर्ण संघ १२९ धावांत गारद झाला. रोहित शर्माच्या अर्धशतकानंतर मोहम्मद शामी आणि जसप्रीत बुमराह यांनी भेदक मारा केला. शमीने चार तर बुमराहने तीन विकेट घेतल्या.  या विजयासह टीम इंडियाने गुणतालिकेत अव्वल स्थान पटकावले आहे. इंग्लंडचा विश्वचषकातील हा  पाचवा पराभव असून या पराभवासह इंग्लंडचे विश्वचषकातील आव्हान संपुष्टात आले आहे. 

भारताने दिलेल्या २३० धावांच्या माफक आव्हानाचा पाठलाग करताना इंग्लंडची सुरुवात अतिशय खराब झाली. एकाही फलंदाजाला मोठी खेळी करता आली नाही. जॉनी बेअरस्टो आणि डेविड मलान यांनी सिराजच्या गोलंदाजीवर हल्लाबोल केला. पण जसप्रीत बुमराहने पहिला धक्का दिला. जसप्रीत बुमराहने डेविड मलान याला १६ धावांवर तंबूत पाठवले. डेविड मलान याने १७ चेंडूत दोन चौकार आणि एका षटकाराच्या मदतीने १६ धावांची खेळी केली. डेविड मलाननंतर जो रुटही लगेच तंबूत परतला. त्याला खातेही उघडता आले नाही. जसप्रीत बुमराहच्या चेंडूवर रुट बाद झाला. रुटनंतर बेन स्टोक्सही तंबूत परतला. त्यालाही खाते उघडता आले नाही. जसप्रीत बुमराहानंतर मोहम्मद शामी यानेही इंग्लंडला लागोपाठ दोन धक्के दिला. आधी बेन स्टोक्सला बाद केले. त्यानंतर जॉनी बेअरस्टो यालाही तंबूचा रस्ता दाखवला. त्यानंतर इंग्लंडची बिनबाद ३० धावांवरुन ४ बाद ३९ अशी दैयनीय अवस्था झाली होती. यामध्ये शमी आणि बुमराह यांचा सिंहाचा वाटा होता. जॉनी बेअरस्टो याने २३ चेंडूत दोन चौकारांच्या मदतीने १४ धावांचे योगदान दिले. 

कर्णधार जोस बटलर याने मोईन अलीच्या साथीने डाव सावरण्याचा प्रयत्न केला, पण कुलदीप यादवने जोस बटलर याला त्रिफाळाचीत केले. जोस बटलर २३ चेंडूत एका चौकाराच्या मदतीने फक्त १० धावा करु शकला. ५२ धावांत इंग्लंडचा अर्धा संघ तंबूत परतला होता. कर्णधार माघारी परतल्यानंतर मोईन अलीने लियाम लिव्हिंगस्टनच्या साधीने डावाला आकार देण्याचा प्रयत्न केला. दोघांची जोडीही जमली होती, पण मोहम्मद शामी याने मोईन अली याला तंबूत पाठवले. मोईन अली याला ३१ चेंडूत फक्त १५ धावा करता आल्या. मोईन अली माघारी परतल्यानंतर ख्रिस वोक्स आणि लियाम लिव्हिंगस्टोन यांनीही भागिदारीचा प्रयत्न केला, पण जाडेजाने कमाल केली. जाडेजाने ख्रिस वोक्स याला तंबूचा रस्ता दाखवला. वोक्स याने २० चेंडूत एका चौकाराच्या मदतीने १० धावा केल्या. लियाम लिव्हिंगस्टोन याचा अडथळा कुलदीप यादवने दूर केला. कुलदीप यादवने लिव्हिंगस्टनला २७ धावांवर बाद केले. लिव्हिंगस्टोन याने ४६ चेंडूत दोन चौकारांच्या मदतीने २७ धावा केल्या. 

डेविड मलान आणि जॉनी बेअरस्टो यांनी दिलेली सलामी इंग्लंडकडून सर्वात मोठी भागिदारी केली . या जोडीने २९  चेंडूमध्ये ३० धावांची भागिदारी केली. त्यानंतर मोईन अली आणि लियाम लिव्हिंगस्टोन यांच्यामध्ये ४८ चेंडूमध्ये २९ धावांची भागिदारी झाली. इंग्लंडकडून एकही अर्धशतकी भागिदारी झाली नाही. त्यामुळेच इंग्लंडला पराभवाचा सामना करावा लागला. अखेरीस अदील रशीद आणि डेविड विली यांनी २८ चेंडूत २७ धावांची भागीदारी केली. रशीदने १३ तर डेविड विलीने १६ धावांची खेळी केली. भारताकडून मोहम्मद शमीने सर्वाधिक ४ विकेट घेतल्या. तर बुमराहने तीन विकेट घेतल्या. कुलदीप यादव याला दोन विकेट मिळाल्या तर जाडेजाना एका फलंदाजाला तंबूत पाठवले.

तत्पूर्वी नाणेफेक गमाविल्यानंतर प्रथम फलंदाजी करणाऱ्या भारताची सुरुवात खूपच खराब झाली. संघाने ४० धावांत तीन विकेट्स गमावल्या होत्या. शुभमन गिल ९ धावा करून बाद झाला, विराट कोहली शून्यावर आणि श्रेयस अय्यर चार धावा करून बाद झाला. विश्वचषकाच्या इतिहासात पहिल्यांदाच कोहलीला खातेही उघडता आले नाही. त्याचवेळी श्रेयस पुन्हा एकदा शॉर्ट बॉलवर बाद झाला. यानंतर रोहितने के.एल. राहुलबरोबर चौथ्या विकेटसाठी ९१ धावांची भागीदारी केली. राहुल ५८ चेंडूंत तीन चौकारांच्या मदतीने ३९ धावा करून बाद झाला. दरम्यान, रोहितने वन डे कारकिर्दीतील ५४ वे अर्धशतक पूर्ण केले. त्याने ६६ चेंडूत ५० धावा केल्या. यानंतर रोहितने सूर्यकुमारसोबत पाचव्या विकेटसाठी ३३ धावांची भागीदारी केली. शतकापासून १३ धावा दूर, आदिल रशीदच्या चेंडूवर रोहित लिव्हिंगस्टोनकरवी झेलबाद झाला. त्याने १०१ चेंडूत ८७ धावांच्या खेळीत १० चौकार आणि तीन षटकार ठोकले. रवींद्र जडेजा आठ धावा करून बाद झाला.

शेवटच्या काही षटकात सूर्याने चांगले फटके मारले आणि भारताची धावसंख्या २०० च्या पुढे नेली. तो ४७ चेंडूंत ४ चौकार आणि एका षटकाराच्या मदतीने ४९ धावा करून बाद झाला. शमी एक धाव काढून बाद झाला. त्याचवेळी जसप्रीत बुमराह आणि कुलदीप यादव यांनी नवव्या विकेटसाठी २१ धावांची भागीदारी केली. शेवटच्या चेंडूवर बुमराह धावबाद झाला. त्याला २५ चेंडूत १६ धावा करता आल्या. कुलदीप नऊ धावा करून नाबाद राहिला. इंग्लंडकडून विलीने सर्वाधिक तीन विकेट्स घेतल्या. त्याला ख्रिस वोक्स आणि आदिल रशीद यांनी प्रत्येकी दोन विकेट्स घेत मदत केली. मार्क वुडला एक विकेट मिळाली.