बेळगाव / प्रतिनिधी 

लाडक्या गणरायाचे आगमन आता अवघ्या १५ दिवसांवर येऊन ठेपले आहे. या पार्श्वभूमीवर बेळगाव महापालिकेने श्रींच्या आगमन आणि विसर्जन सोहळ्याची पूर्वतयारी युद्धपातळीवर सुरु केली आहे. महापौर शोभा सोमनाचे, उपमहापौर रेश्मा पाटील आणि पालिका आयुक्त अशोक दुडगुंटी यांनी आज गणेश मंडळांचे पदाधिकारी व संबंधित अधिकाऱ्यांसमवेत श्री विसर्जन मार्ग आणि तलावांची पाहणी केली.

महापालिका आयुक्त अशोक दुडंगुडी यांनी श्री गणेश विसर्जन मिरवणूक मार्गाची पाहणी करत रस्त्यांवरील खड्डे तातडीने बुजविण्याचे आदेश बांधकाम विभागाला दिले आहेत. त्याचबरोबर मिरवणूक मार्गावरील अतिक्रमणे, रस्त्यांवर लोंबकळणार्‍या वीजतारांचे अडथळे दूर करण्यात येणार असल्याचे त्यांनी सांगितले. 

तत्पूर्वी सकाळी ९ वाजता खडेबाजार येथून पाहणी दौऱ्याला सुरुवात झाली. गणपत गल्ली, मारुती गल्ली, हुतात्मा चौक समादेवी गल्ली, धर्मवीर संभाजीराजे चौक, टिळक चौक, हेमू कॉलनी चौक, शनि मंदिर, छत्रपती शिवाजी उड्डाणपूल, कपलेश्वर तलाव या मार्गाने गणेश विसर्जन मिरवणूक असते. त्यानुसार या मार्गाची पाहणी करत अधिकार्‍यांना विविध सूचना करण्यात आल्या आहेत. 

या पाहणी दौऱ्यास हेस्कॉमचे अभियंता सुनील कुमार, अश्विन शिंदे, संजीव हमनावर,फॉरेस्ट शहर रेंजर विनोद गौडर, लोकमान्य टिळक गणेश महामंडळाचे अध्यक्ष विजय जाधव, अर्जुन रजपूत, सुनील जाधव, अरुण पाटील, प्रवीण पाटील, रोहित रावळ,जनसंपर्क प्रमुख विकास कलघटगी, रणजित पाटील, सागर पाटील, नगरसेवक गिरीश धोंगडी, राजू भातकांडे, जयतीर्थ सौन्दती, संतोष पेडणेकर, नितीन जाधव, मनपा शहर अभियंता सचिन कांबळे घनकचरा व्यवस्थापन विभागाचे संचालक पूर्व, पश्चिम विभागातील स्वच्छता निरीक्षक आदि उपस्थित होते.