कित्तूर / वार्ताहर 

कित्तूर पोलीस स्थानकाच्या हद्दीतील तिगडोळी गावात गुन्हेगारी प्रवृत्तीच्या एका व्यक्तीचा खून करण्यात आला. रविवारी रात्री उशिरा ही घटना घडली. विजय रामचंद्र अरेर (वय ३२) असे खून झालेल्या व्यक्तीचे नाव आहे. 

याबाबत घटनास्थळावरून प्राप्त माहितीनुसार, मृत विजय रामचंद्र अरेर आणि कल्लाप्पा सदेप्पा क्यातन्नावर (वय ४८) यांच्यात किरकोळ कारणावरून वाद झाला. यावेळी मद्यधुंद अवस्थेत विजयने कल्लाप्पा याच्यावर तलवारीने वार केले. यानंतर कल्लाप्पा आणि भरत हित्तलकेरी यांनी एकत्रितपणे विजयवर कोयत्याने वार केले. या विजयच्या हाताला गंभीर दुखापत झाल्याने अतिरक्तस्राव होऊन त्याचा मृत्यू झाला. या घटनेत  कल्लाप्पा देखील जखमी झाला असून, त्याच्यावर धारवाड जिल्हा रुग्णालयात उपचार सुरू आहेत. या प्रकरणी कित्तूर पोलिस स्थानकात गुन्हा दाखल करण्यात आला आहे.