बेळगाव / प्रतिनिधी

बेळगाव महापालिकेचे आयुक्त अशोक दुडगुंटी यांनी आज सकाळी शहरातील विविध भागात भेट देऊन कचरा व्यवस्थापनाची पाहणी केली. यावेळी त्यांनी अधिकाऱ्यांना नागरिकांच्या तक्रारी ऐकून योग्य ती कार्यवाही करण्याचे निर्देश दिले. 

सकाळी ५.३० वा. त्यांनी सदाशिवनगर येथील वाहन शाखेत जाऊन वाहनांची तपासणी केली व वाहनचालकांची उपस्थिती तपासली. सर्व वाहन चालक व क्लिनर यांना सकाळी ५.४५ वा. कामावर हजर राहून प्रामाणिकपणे काम करण्याची निर्देश त्यांनी दिले, यानंतर मनपाच्या कचरा वाहक गाडीत बसून त्यांनी स्वतः कार्यालयांना भेट देऊन  नागरी कर्मचाऱ्यांची उपस्थिती तपासणी व आरोग्य निरीक्षकांना सूचना केल्या. 


त्यानंतर नगरसेवक अफरोज मुल्ला यांच्यासोबत प्रभाग क्र. ५ खडे बाजार व दरबार गल्ली येथील कचराकुंडीची तपासणी करून संबंधित निरीक्षकांना योग्य ते निर्देश दिले. जनतेच्या तक्रारींवर चर्चा करून संबंधितांना सूचना केल्या. यानंतर कोतवाल गल्ली व काकर गल्ली भाजी मार्केटला भेट देऊन भाजी मार्केट कचऱ्याचीही त्याच दिवशी रात्री ९ नंतर  विल्हेवाट लावण्याचे निर्देश संबंधितांना दिले. याशिवाय मोठ्या प्रमाणात कचरा निर्माण करणाऱ्या शहरातील एका नामांकित हॉटेलला त्यांनी भेट दिली आणि कच्चा कचरा प्रक्रिया केंद्राची पाहणी तसेच मोठा कचरा निर्माण करणाऱ्यांना निर्देश देण्यासाठी पर्यावरण अभियंत्यांना  बैठक बोलावण्याचे निर्देश दिले. तेथून मध्यवर्ती बस स्थानकाला भेट देऊन कचऱ्याची वेळेवर विल्हेवाट लावण्यासाठी अधिकाऱ्यांना योग्य त्या सूचना केल्या.