महाराष्ट्राच्या राजकारणात मोठा भूकंप

• अजित पवारांनी घेतली उपमुख्यमंत्री पदाची शपथ

• शिवसेनेनंतर राष्ट्रवादीलाही खिंडार !

• समर्थक आमदारांसह अजित पवारांचा  शिंदे - फडणवीस सरकारला पाठिंबा 

• राष्ट्रवादी म्हणूनच सरकारमध्ये सामील !

• विधानसभा, लोकसभा निवडणुका घड्याळ चिन्हावरच लढविणार : अजितदादा पवार

 महाराष्ट्राच्या उपमुख्यमंत्री पदाची शपथ घेताना अजित पवार 

मुंबई दि. २ जुलै :  राष्ट्रवादी काँग्रेसचे ज्येष्ठ नेते अजित पवार ३० ते ४० आमदारांसह शिंदे-फडणवीस सरकारमध्ये सामील झाले आहेत. आज सकाळी देवगीरी बंगल्यावर अजित पवारांनी समर्थक आमदारांची बैठक घेतली. त्यानंतर संबंधित आमदारांच्या सहीचं पत्र घेऊन अजित पवार राजभवनावर दाखल झाले. यानंतर काही वेळातच अजित पवारांनी महाराष्ट्राचे उपमुख्यमंत्री म्हणून शपथ घेतली आहे. अजित पवारांसह राष्ट्रवादी काँग्रेसचे अनेक वरिष्ठ नेतेही मंत्रीपदाची शपथ घेतली आहे.

आज सकाळपासूनच राज्यातील राजकारणात भूकंपसदृश्य परिस्थिती निर्माण झाली होती. राष्ट्रवादीचे अनेक आमदार राजभवनात दाखल झाले होते. अजित पवार सरकारमध्ये सामील होणार असल्याच्या चर्चा सुरू होत्या. परंतु, सरकारकडून याबाबत काहीच अधिकृत खुलासा करण्यात आला नव्हता. अखेर, आज दुपारीच काही वेळापूर्वी राजभवनात शपथविधी सोहळा झाला. यावेळी अजित पवारांनी राज्याच्या उपुख्यमंत्री पदाची शपथ घेत असल्याचं जाहीर केलं. “मी अजित पवार, महाराष्ट्राच्या राज्याच्या उपमुख्यमंत्री म्हणून शपथ घेतो”, असं अजित पवार म्हणाले.

मंत्रीमंडळात सामील झालेल्या नेत्यांची यादी :

1. अजित पवार - उपमुख्यमंत्री
2. छगन भुजबळ - मंत्री
3. दिलीप वळसे-पाटील- मंत्री
4. हसन मुश्रीफ - मंत्री
5. धनंजय मुंडे - मंत्री
6. धर्मारावबाबा आत्राम - मंत्री
7. आदिती तटकरे - मंत्री
8. संजय बनसोडे - मंत्री
9. अनिल पाटील - मंत्री

खरंतर, अलीकडेच अजित पवार हे राष्ट्रवादी काँग्रेसच्या प्रदेशाध्यक्ष पदासाठी उत्सुक असल्याचं बोललं जात होतं. त्यासाठी अजित पवार आपल्या समर्थक आमदारांच्या वतीने पक्षावर दबाब टाकत होते, अशीही चर्चा सुरू होती. यानंतर आता अजित पवार राजभवनावर दाखल झाले. अजित पवारांनी उपमुख्यमंत्री पदाची शपथ घेतली आहे. त्यांच्यासह राष्ट्रवादीच्या इतरही नेत्यांनी मंत्रीपदाची शपथ घेतली. आता देवेंद्र फडणवीस आणि अजित पवार दोघंही महाराष्ट्राचे उपमुख्यमंत्री म्हणून काम करतील.काही दिवसांपूर्वी राष्ट्रवादीचे सर्वेसर्वा शरद पवार यांच्या कन्या खासदार सुप्रिया सुळे यांनी लवकरच महाराष्ट्रात दोन राजकीय भूकंप होणार असल्याचे संकेत दिले होते.

- अजितदादांचा राष्ट्रवादी काँग्रेसवर दावा -

दरम्यान, उपमुख्यमंत्री अजितदादा पवार यांनी घेतलेल्या पत्रकार परिषदेत आपण पक्ष सोडला नसून राष्ट्रवादी म्हणूनच सरकारमध्ये सामील झालो आहोत. आगामी विधानसभा व लोकसभा  निवडणुका घड्याळ चिन्हावरच  लढवणार असल्याचे सांगत राष्ट्रवादी काँग्रेस पक्षावर दावा सांगितला. आगामी निवडणुका या पंतप्रधान मोदींसोबत राहूनच लढवणार असल्याचे देखील स्पष्ट केले.