बेळगाव / प्रतिनिधी  

फोंड्याचे माजी आमदार लवू मामलेदार (वय ६७) यांच्या खून प्रकरणी अटक करण्यात आलेल्या सुभाषनगर येथील तरुणाची हिंडलगा  मध्यवर्ती कारागृहात रवानगी करण्यात आली आहे. न्यायालयाने त्याला १४ दिवसांची न्यायालयीन कोठडी दिली आहे.

अमिरसोहेल उर्फ मुजाहिद शकीलसाब सनदी (वय २७) रा. दुसरा क्रॉस, सुभाषनगर असे त्याचे नाव आहे. मार्केटचे पोलीस उपनिरीक्षक विठ्ठल हावण्णावर व त्यांच्या सहकाऱ्यांनी या तरुणाला अटक करून शनिवारी रात्री येथील प्रथम वर्ग न्यायदंडाधिकारी  द्वितीय न्यायालयासमोर हजर केले.

न्यायालयाने १४ दिवसांसाठी अमिरसोहेलला न्यायालयीन कोठडी दिली. त्यानंतर रात्री उशिरा या तरुणाला हिंडलगाव मध्यवर्ती कारागृहात नेऊन सोडण्यात आले. शनिवार दि. १५ फेब्रुवारी रोजी दुपारी खडे बाजार मध्ये माजी आमदार यांची कार ऑटोला घासल्याचे निमित्त होऊन कारचा पाठलाग करीत लॉजसमोर अमिर सोहेलने लहू मामलेदार यांना मारहाण केली होती.

मारहाणीच्या घटनेनंतर लॉजमध्ये जाताना रिसेप्शन जवळच लवू मामलेदार कोसळले. लॉज कर्मचाऱ्यांनी त्यांना तातडीने कारमधून सिव्हिल हॉस्पिटलला हलवताना वाटेतच त्यांचा मृत्यू झाला आहे. यासंबंधी हॉटेलचे व्यवस्थापक अडव्याप्पा करलिंगन्नावर यांनी दिलेल्या फिर्यादीवरून एफआयआर दाखल करण्यात आला आहे.

भारतीय न्याय संहिता २००३, कलम १०३ (१), १२६ (२), १५२ अन्वये एफआयआर दाखल करण्यात आला आहे. मारहाणीच्या घटनेनंतर लगेच पोलिसांनी अमिर सोहेलला ताब्यात घेतले होते. रात्री त्याची कसून चौकशी करू अटकेची कायदेशीर प्रक्रिया पूर्ण करण्यात आली.