• कुंभमेळ्याहून परतत असताना दुर्घटना  

मध्यप्रदेश : प्रयागराज येथे सुरू असलेल्या महाकुंभमेळ्यात सहभागी होऊन परतत असताना बेळगावातील चौघांचा शुक्रवारी पहाटे ३ वा. मध्यप्रदेशातील इंदोरजवळ झालेल्या रस्ते अपघातात मृत्यू झाला आहे. या दुर्दैवी घटनेमुळे पुन्हा एकदा बेळगाव शहर हळहळले आहे. सागर आणि नीता अशी अपघातात मृत्यू झालेल्या दोघांची नावे असल्याचे समजते. तर उर्वरित चार जणांची नावे अद्याप निश्चित झालेली नाहीत. 

सदर अपघातात मृत्युमुखी पडलेल्या बेळगावच्या मृतांमध्ये तीन महिला एक पुरुष असल्याची माहिती उपलब्ध झाली आहे. बेळगावचे चारही मयत गणेशपुर, शिवाजीनगर आणि होसुर वडगाव येथील रहिवासी असल्याचे बोलले जात आहे. याच अपघातात इंदोर येथील स्थानिक असणाऱ्या आणखी दोघांचा मृत्यू झाल्याचे वृत्त आहे.  प्रयागराज येथून भाविकांना बेळगावकडे परत घेऊन येताना  ट्रॅव्हलर चालकाचे वाहनावरील नियंत्रण सुटल्याने भरधाव ट्रॅव्हलरने प्रथम एका दुचाकीला आणि त्यानंतर रस्त्याकडेला थांबलेल्या टँकरला धडक दिल्यामुळे हा अपघात घडला. 

अपघाताची माहिती मिळताच मानपुर पोलीस पोलिसांनी तात्काळ घटनास्थळी दाखल होऊन प्रथम मदत कार्य हाती घेतले त्यानंतर अपघाताचा पंचनामा करून अधिक तपास सुरू केला आहे.

दरम्यान इंदोरचे भाजप जिल्हाध्यक्ष मिश्रा जखमींची काळजी घेत आहेत. त्यांनी बेळगावचे खासदार जगदीश शेट्टर यांच्याशी आधीच संपर्क साधून माहिती दिल्याचे कळते. कुंभमेळ्यातील चेंगराचेंगरीच्या घटनेत चार जणांचा मृत्यू झाला. तर एका भाविकाचा हृदयविकाराने मृत्यू झाला आहे. त्यात आता पुन्हा या दुर्दैवी अपघाताने चार बळी घेतल्यामुळे अवघ्या शहरावर शोककळा पसरली आहे.