• विद्यमान महापौर - उपमहापौरांचा कार्यकाळ १४ फेब्रुवारी रोजी संपुष्टात

बेळगाव / प्रतिनिधी 

बेळगाव महापालिका महापौर - उपमहापौर निवडणुकीच्या दृष्टीने राजकीय हालचालींना वेग आला आहे. विद्यमान महापौर सविता कांबळे आणि उपमहापौर आनंद चव्हाण यांचा कार्यकाळ १४ फेब्रुवारी रोजी संपुष्टात येणार आहे. २३ व्या महापौर - उपमहापौर निवडणुकीबाबत प्रादेशिक आयुक्त निर्णय घेऊन तारीख निश्चित करणार आहेत. लवकरच तारीख जाहीर होण्याची शक्यता आहे.  त्यामुळे सर्वांच्या नजरा आता प्रादेशिक आयुक्तांच्या निर्णयाकडे लागून राहिल्या आहेत. 

बेळगाव महापालिकेत लोकनियुक्त नगरसेवक ५८ , लोकसभा सदस्य २, विधानसभा सदस्य ३, विधान परिषद सदस्य १ असे एकूण ६५ मतदार निवडणुकीत मतदानाचा हक्क बजावू शकतात.

महापालिकेत ५८ नगरसेवक असून भाजपचे ३५ , काँग्रेस व एमआयएमचे १० सदस्य नगरसेवक निवडून आले आहेत. दोन अपक्ष नगरसेवकांनी भाजपला पाठिंबा दिला आहे. तर म. ए. समितीचे तीन नगरसेवक असून ते विरोधी गटात आहेत. महापालिकेतील विरोधी गटनेतेपद काँग्रेसकडे आहे.

यावेळी महापौरपद सामान्य प्रवर्गासाठी तर उपमहापौर सामान्य महिलेसाठी राखीव आहे. त्यामुळे या दोन्ही पदांसाठी चुरस निर्माण होणार आहे. निवडणुकीच्या तयारीसाठी महापालिकेच्या कौन्सिल विभागाकडून प्रादेशिक आयुक्त कार्यालयाला प्रस्ताव पाठविण्यात आला आहे.

महापौर व उपमहापौर पदासाठीचे आरक्षण कोणते आहे? याची माहिती प्रस्तावात नमूद करण्यात आली आहे. तसेच निवडणुकीत एकूण मतदारसंख्या किती आहे? याची देखील माहिती देण्यात आली आहे. या माहितीच्या आधारावर प्रादेशिक आयुक्त कार्यालयाकडून निवडणुकीची तयारी केली जाणार आहे.  एकंदरीत महापौर - उपमहापौर निवडणूक १४ फेब्रुवारीपूर्वी होणार की या प्रक्रियेला विलंब लागणार, याकडे सर्वांचे लक्ष लागले आहे.