• जिल्हाधिकारी मोहम्मद रोशन 

बेळगाव / प्रतिनिधी 

बेळगाव अनगोळ येथे काल सायंकाळी भव्य मिरवणूक काढून छत्रपती संभाजी महाराजांच्या पुतळ्याचे अनावरण करण्यात आले. मात्र, हे अनधिकृत असून पुन्हा एकदा छत्रपती संभाजी महाराजांच्या पुतळ्याचे अनावरण थाटामाटात करण्यात येणार असल्याचे बेळगावचे जिल्हाधिकारी मोहम्मद रोशन यांनी सांगितले.

अनगोळ येथे रविवारी सायंकाळी छत्रपती धर्मवीर संभाजी महाराज यांच्या पुतळ्याचे अनावरण करण्यात आल्याने अनगोळवासियांनी आज पुन्हा बेळगावच्या जिल्हाधिकाऱ्यांकडे धाव घेतली.

यावेळी बोलताना जिल्हाधिकारी मोहम्मद रोशन म्हणाले की, रविवारी अनगोळ येथे आयोजित छत्रपती धर्मवीर संभाजी महाराज मूर्ती अनावरणाचा कार्यक्रम अनधिकृत व शिष्टाचाराचे उल्लंघन करणारा होता. छत्रपती संभाजी महाराज मूर्तीचे अनावरण अनधिकृत आहे. सरकारकडून अधिकृत तारीख जाहीर केली जाईल आणि आमदार, मंत्री, निवडून आलेले लोकप्रतिनिधी यांच्यासह सर्व समाजाच्या नेत्यांना आमंत्रित केले जाईल आणि मी शनिवारी अनगोळ येथील ज्येष्ठ नागरिकांशी बोललो असे त्यांनी सांगितले. 

जिल्हा प्रशासनाने योग्य वेळी संभाजी महाराजांच्या पुतळ्याचे अनावरण करण्यासाठी शासनाची परवानगी घ्यावी. मात्र रविवारी संभाजी महाराजांच्या पुतळ्याचे होणारे अनावरण हे अनधिकृत आहे. आणखी एकदा महापालिकेत ठराव पास होऊन शहर पोलीस आयुक्तालयाची एनओसी मिळवून शासनाकडे पाठवली जाईल व जिल्हा प्रशासन मोठ्या थाटामाटात पुतळ्याचे लोकार्पण करेल. तसेच उपस्थित मान्यवरांच्या नावाचा फलकही लावण्यात येणार आहे. धर्मवीर संभाजी महाराज यांच्या पुतळ्याभोवती बॅरिकेड लावण्यात येणार आहे. लवकरच अनगोळ गावाला भेट देऊन सर्वांशी चर्चा करणार असल्याचे त्यांनी सांगितले. या बैठकीला अनगोळ येथील नागरिक मोठ्या संख्येने उपस्थित होते.