• एक गंभीर जखमी

खानापूर / प्रतिनिधी 

खानापूर-लोंढा महामार्गावर जोमतळे गावानजीक, दुचाकी वरील नियंत्रण सुटल्याने, दुचाकी वेगाने रस्त्यानजीक असलेल्या खड्ड्यात जाऊन पडली. त्यामुळे दुचाकीस्वार ठार तर दुचाकीच्या पाठीमागे बसलेला युवक गंभीर जखमी झाला आहे. आकाश अरुण गवाळकर (वय २३, रा.मुंडवाड) असे मृत दुचाकीस्वाराचे नाव असून  शिवराज विनोद जाधव (वय २३) असे जखमी युवकाचे नाव आहे. 

याबाबत घटनास्थळावरून प्राप्त माहिती अशी की, नंदीहळ्ळी येथील एका मिलिटरी ट्रेनिंग अकॅडमी मध्ये मिलिटरी ट्रेनिंगचे शिक्षण घेत असलेले खानापूर तालुक्यातील मुंडवाड येथील दोघे युवक, शनिवारी व रविवारी अकॅडमीला सुट्टी असल्याने, आपल्या मुंडवाड गावाकडे जात असताना, खानापूर लोंढा महामार्गावरील जोमतळे गावानजीक दुचाकीवरील नियंत्रण सुटल्याने, दुचाकी थेट रस्त्याकडेला असलेल्या खड्ड्यात जाऊन पडली. त्यामुळे दुचाकीस्वार आकाश व दुचाकीच्या पाठीमागे बसलेला त्याचा मित्र शिवराज हे दोघे गंभीर जखमी झाले. या अपघातानंतर त्यांना उपचारासाठी रुग्णवाहिकेतून खानापूर येथील शासकीय रुग्णालयात आणण्यात आले. डॉक्टरांनी तपासणी केली असता दुचाकीस्वार आकाश  गवाळकर याला मृत घोषित करण्यात आले. तर शिवराज विनोद जाधव याला गंभीर दुखापत झाल्याने, पुढील उपचारासाठी बेळगाव येथील रुग्णालयात पाठविण्यात आले आहे.

या घटनेची नोंद खानापूर पोलीस स्थानकात करण्यात आली असून उत्तरीय तपासणीनंतर मृतदेह नातेवाईकांच्या ताब्यात देण्यात येणार आहे. या दुर्दैवी घटनेमुळे मुंडवाड व परिसरात हळहळ व्यक्त करण्यात येत आहे.