खानापूर / प्रतिनिधी 

बेळगाव - पणजी महामार्गावर कारची दुचाकीला धडक बसून झालेल्या अपघातात एकजण गंभीर जखमी झाला आहे.  सोमवारी (दि. २०)  जानेवारी रोजी खानापूर तालुक्यातील होनकल क्रॉसजवळ ही घटना घडली. शंकर पाऊसकर (वय ३६, रा. तिंबोळी रामनगर) असे अपघातात जखमी झालेल्या दुचाकीस्वाराचे नाव आहे. अपघातानंतर त्यांना तात्काळ बेळगाव येथील खासगी रुग्णालयात उपचारासाठी दाखल करण्यात आले आहे.

याबाबत घटनास्थळावरून प्राप्त माहिती अशी की, होनकल क्रॉसजवळील बेळगाव - पणजी महामार्गावर दुचाकीस्वार शंकर यांनी दुभाजक ओलांडून रस्ता पार करण्याचा प्रयत्न केला. त्याचवेळी (जीजे - १८ , बीडी - १४५६) क्रमांकाच्या कारने दुचाकीला जोरदार धडक दिली. धडकेमुळे ते कारसमोर पडले. या अपघातात त्यांच्या डोक्याला गंभीर इजा होऊन अतिरक्तस्त्राव झाला. अपघातानंतर शंकर पाऊसकर यांना तातडीने खानापूर सरकारी रुग्णालयात नेण्यात आले. मात्र, प्रकृती गंभीर असल्यामुळे पुढील उपचारांसाठी त्यांना बेळगाव येथे हलविण्यात आले.