बेळगाव / प्रतिनिधी 

कलखांब (ता. बेळगाव) येथील ग्रामपंचायत कार्यालय काही अज्ञातांनी भरलेल्या बियरच्या बाटल्या फेकून पेटवून देण्याचा प्रयत्न केला. शुक्रवारी रात्री घडलेली ही खळबळजनक घटना आज शनिवारी सकाळी उघडकीस आली. यामुळे ग्रामपंचायतीच्या इमारतीचे नुकसान झाले असून कलखांब परिसरात चर्चेचा विषय झाला आहे.

सदर प्रकार नेहमीप्रमाणे शनिवारी सकाळी कार्यालयाकडे आलेल्या ग्रामपंचायतीचे कर्मचारी व पदाधिकारी यांच्या निदर्शनास येताच त्यांनी तात्काळ घटनेची माहिती पोलिसांना दिली. तेव्हा पोलिसांनी तात्काळ घटनास्थळी धाव घेऊन पाहणी केली.

घटनास्थळी ग्रामपंचायत पदाधिकारी व स्थानिकांकडून प्राथमिक माहिती जाणून घेतल्यानंतर पोलिसांनी हल्लेखोरांचा तपास हाती घेतला आहे. दरम्यान चक्क ग्रामपंचायत कार्यालयात पेटवून देण्याच्या प्रयत्नामुळे कलखांब गावात खळबळ उडाली असून या घटनेच्या बाबतीत तर्कवितर्क केले जात आहेत.

या भागात काल एका लोकप्रतिनिधीचा दौरा आखण्यात आला होता वेळेच्या कमतरतेमुळे एका समुदायाच्या गल्लीतील विकासकामांच्या भूमिपूजनासाठी ते लोकप्रतिनिधी उपस्थित राहू शकले नाहीत. यावेळी नियोजित ठिकाणी त्यांच्या आगमनाची, स्वागताची आणि भूमिपूजनासाठी आवश्यक ती सर्व तयारी करून ठेवण्यात आली होती. यामुळे संतापलेल्या  गटाने संतापाच्या भरात ग्रामपंचायत कार्यालयाची तोडफोड  केल्याची  आहे का? याची चर्चा गावात सुरु आहे. याप्रकरणी पोलीस अधिक तपास घेत असून संबंधितांवर कारवाई केली जाईल का? याकडे सर्वांचे लक्ष लागले आहे.