• बेळगाव बार असोसिएशनकडून घटनेचा निषेध  
  • न्यायालयाच्या आवारात वकिलांना सुरक्षा पुरविण्याची मागणी 
  • जिल्हाधिकाऱ्यांमार्फत शासनाला निवेदन 

बेळगाव / प्रतिनिधी 

तामिळनाडूमध्ये न्यायालयाच्या आवारात एका वकिलावर भल्या पहाटे जीवघेणा हल्ला झाला. या घटनेचा निषेध करण्यासाठी बेळगाव बार असोसिएशनने आज जिल्हाधिकारी कार्यालयाच्या आवारात आंदोलन  केले. यावेळी न्यायालयाच्या आवारात वकिलांना सुरक्षा पुरविण्याची मागणी करण्यात आली, तसेच उपरोक्त मागणीचे निवेदन जिल्हाधिकाऱ्यांमार्फत शासनाला देण्यात आले. अप्पर जिल्हाधिकारी विजयकुमार होनकेरी यांनी हे निवेदन स्वीकारले. 

यावेळी बेळगाव बार असोसिएशनचे अध्यक्ष एस. एस. किवडसण्णावर म्हणाले, तामिळनाडूमध्ये  न्यायालयाच्या आवारात हल्लेखोरांनी वकिलावर हल्ला केला. या घटनेतील आरोपींवर कठोर कारवाई करावी. तसेच वकिलांना सुरक्षा पुरविण्यात यावी, अशी मागणी त्यांनी केली. 

तर बेळगाव बार असोसिएशनचे सचिव वाय. के. दिवटे म्हणाले, अलीकडे वकिलांवर हल्ले होत आहेत. राज्य सरकार आणि भारत सरकारने हल्लेखोरांवर वकील सुरक्षा कायद्यांतर्गत कारवाई करावी. तसेच सर्व न्यायालय परिसरात वकिलांना सुरक्षा पुरवावी आणि त्यांना न घाबरता कर्तव्य बजावता यावे, असे वातावरण निर्माण करण्याची मागणी त्यांनी केली.

यावेळी बेळगाव बार असोसिएशनचे पदाधिकारी व सदस्य मोठ्या संख्येने उपस्थित होते.