मतदार ओळखपत्रांचे घरोघरी जाऊन वाटप करा

• जिल्हा निवडणूक अधिकारी नितेश पाटील यांची सूचना 

• जिल्हाधिकारी कार्यालयात सहाय्यक निवडणूक अधिकाऱ्यांची बैठक 

बेळगाव / प्रतिनिधी 

मतदारांना त्यांच्या मतदान केंद्रांबाबत व्होटर स्लिप दिल्यास अगोदर मतदान करणे सोयीचे होईल, त्यामुळे प्रत्येक मतदान केंद्रावर व्होटर स्लिपचे वाटप सक्तीचे करावे, असे जिल्हा निवडणूक अधिकारी नितेश पाटील यांनी सांगितले.

जिल्हाधिकारी कार्यालयाच्या दालनात सोमवारी (दि.२९) एप्रिल रोजी बेळगाव लोकसभा मतदारसंघातील सहाय्यक निवडणूक अधिकाऱ्यांच्या बैठकीत बोलताना ते पुढे म्हणाले, मतदानाचा दिवस जवळ येत असल्याने निवडणूक कर्मचाऱ्यांनी तातडीने घरोघरी जाऊन मतदार ओळखपत्रांचे वाटप करावे अशी सूचना त्यांनी केली. 

मतदान जनजागृतीसाठी अनेक जनजागृती कार्यक्रम आयोजित केले जातात. त्याशिवाय, बीएलओ घरोघरी जाऊन मतदार ओळखपत्रांचे वाटप करतील, त्यामुळे मतदानाची टक्केवारी वाढेल.गेल्या निवडणुकीत ज्या मतदान केंद्रांवर मतदान कमी झाले होते, त्या मतदान केंद्रांवर मतदार ओळखपत्रांचे वाटप करण्यात यावे. यामुळे जनतेला त्यांच्या मतदान केंद्रापर्यंत पोहोचण्याची सोय होणार असल्याचे नितेश पाटील यांनी सांगितले.

या बैठकीला अप्पर जिल्हाधिकारी विजयकुमार होनकेरी, प्रोबेशनरी आयएएस जिल्हाधिकारी गीता कौजलगी, सहाय्यक निवडणूक अधिकारी पी.एन.लोकेश, राजश्री जैनापूर, डॉ.राजीव कुलर, बलराम चव्हाण, प्रभावती फक्कीरापुर, सतीश कुमार, शकील अहमद यांच्यासह तहसीलदार उपस्थित होते.