बेळगाव / प्रतिनिधी 

बेळगाव शहरात मुस्लिम बांधवांनी पवित्र ईद-उल-फित्र अर्थात रमजान ईद सण उत्साहात साजरा केला. रमजान सणाचा एक भाग म्हणून हजारो मुस्लिम भाविकांनी आज गुरुवारी शहरातील ईदगाह मैदानावर सामूहिक नमाज अदा केली.

प्रारंभी गुरुवारी सकाळी रमजानच्या दिवशी मुस्लिम भाविकांनी स्वच्छ कपडे परिधान करून मशिदींमध्ये सामूहिक नमाज अदा केली. त्यानंतर शहरातील जिल्हाधिकारी कार्यालयानजीक ईदगाह मैदानावर हजारो मुस्लिम बांधवांनी सामूहिक नमाज अदा केली. गरीब-श्रीमंत, उच्च-नीच असा भेद विसरून सर्वांनी एकमेकांना मिठी मारून शुभेच्छा दिल्या. विशेषतः:लहान मुलांनी नवीन कपडे परिधान करून रमजानचा आनंद द्विगुणित केला. 

मुस्लिम धर्मगुरू मुफ्ती जोहर यांच्या नेतृत्वाखाली सामूहिक प्रार्थना करण्यात आली. हाफिज अब्दुल रझाक मोमीन यांनी नमाज पठण केले, नइम खतीब खुत्बा यांनी अल्लाहविषयी उपदेश केला. यावेळी मुस्लिम धर्मगुरु मुफ्ती जोहर यांनी समाजातील सर्वांसोबत राहावे. केवळ या महिन्यात इस्लामचे विधी पाळणे पुरेसे नाही; वर्षभर त्यांचे अनुसरण करा आणि सर्वशक्तिमान अल्लाहचा आशीर्वाद घ्या. तरच आमचे जीवन सार्थक होईल, असे ते म्हणाले.

बेळगाव जिल्हाधिकारी कार्यालयासमोरील अंजुमन मैदानावर बेळगाव उत्तर मतदारसंघाचे माजी आमदार फिरोज सेठ, विद्यमान आमदार राजू सेठ यांच्यासह विविध मान्यवरांनी एकमेकांना सणाच्या शुभेच्छांची देवाणघेवाण केली. 

यावेळी प्रसारमाध्यमांशी  बोलताना आमदार राजू सेठ यांनी सर्व मुस्लिम भाविकांना ईद-उल-फित्र (रमजान सण) च्या शुभेच्छा दिल्या आणि सर्वांनी एकत्र राहून शांततेत रहावे, असे सांगितले. माजी आमदार फिरोज सेठ म्हणाले, ईद-उल-फित्र हे वर्ष सर्वांना चांगले जावो, अल्लाह सर्वांचे भले करो. यावेळी हजारो मुस्लिम बांधव मोठ्या संख्येने उपस्थित होते.