बेळगाव / प्रतिनिधी 

बेळगाव लोकसभा मतदारसंघातील भाजपचे उमेदवार जगदीश शेट्टर यांनी आज सोमवार (दि.१५) एप्रिल रोजी निवडणूक निर्णय अधिकारी नितेश पाटील यांच्याकडे उमेदवारी अर्ज सादर केला. 

उमेदवारी अर्ज सादर केल्यानंतर जगदीश शेट्टर म्हणाले, लोकसभा निवडणुकी संदर्भात बेळगाव लोकसभा मतदारसंघातून भाजपचा उमेदवार म्हणून मी आज नामनिर्देशनपत्र दाखल केले आहे.
बुधवार दि. १७ एप्रिल रोजी सकाळी १० वाजता कार्यकर्त्यांसह बेळगावमधील समादेवी गल्लीतील श्री समादेवी मंदिरापासून जिल्हाधिकारी कार्यालयापर्यंत मोठ्या मिरवणुकीद्वारे नामनिर्देशनपत्र दाखल करणार असल्याचे त्यांनी सांगितले.

यावेळी त्यांच्यासमवेत खासदार मंगला अंगडी, भाजपचे राज्य उपाध्यक्ष तथा माजी आमदार अनिल बेनके, गोकाकचे आमदार रमेश जारकीहोळी, विधानपरिषद सदस्य हणमंत निराणी आदि उपस्थित होते. 

शुक्रवारपासून नामांकन पत्र अर्थात उमेदवारी अर्ज दाखल करून घेण्यास सुरुवात झाली आहे. मात्र शनिवार व रविवारी सरकारी सुट्टी असल्याने आज सोमवारपासून उमेदवारी अर्ज भरण्याच्या कामास वेग येणार आहे.