• शेतवाडीत मुक्तसंचार : पिकाची नासधूस 
  • नागरिकांत भीतीचे वातावरण

खानापूर / प्रतिनिधी 

खानापूर तालुक्यातील नंदगड भागातील बेकवाड गावात हत्तीचे आगमन झाले असून, बेकवाड परिसरातील नागरिकात भीतीचे वातावरण निर्माण झाले आहे. गोल्लीहळ्ळी, आणि नंदगड फॉरेस्ट खात्याचे अधिकारी बेकवाड येथे ठाण मांडून बसले आहेत.

सदर हत्ती गंदिगवाड व आजूबाजूच्या परिसरातील शेतकऱ्यांचे नुकसान करून काल रात्री बेकवाड गावात त्यांचे आगमन झाले असल्याचे समजते. आज शनिवारी २३ मार्च रोजी सकाळी, ही बातमी समजल्यानंतर, बेकवाड व पंचक्रोशीतील नागरिकांनी  हत्तीला पाहण्यासाठी गर्दी केली होती. गोल्लीहळ्ळी आणि नंदगड येथील फॉरेस्ट खात्याचे अधिकारी व कर्मचारी सदर हत्तीला हुसकावण्यासाठी प्रयत्न करत आहेत. सदर हत्ती बेकवाड आणि कुंणकीकोप्प, गावच्या हद्दीत फिरत आहे.

हत्ती आल्याची माहिती समजताच गोल्लीहळ्ळी व नंदगड वनविभाग व नंदगड पोलीस स्थानकाच्या अधिकाऱ्यांनी बेकवाड येथे तातडीने धाव घेतली आणि  हत्तीला जंगलात हुसकावण्यासाठी प्रयत्न सुरु केले. यामध्ये अशोक बी. हुली (डेप्युटी आरएफओ गोल्लीहळ्ळी विभाग) , महेश लक्षण लच्यन (डेप्युटी आरएफओ नंदगड विभाग) तसेच नंदगड पोलीस स्थानकाचे  सहाय्यक पोलिस उपनिरीक्षक मोकाशी व शिवकुमार तुरमुंडी, व वनविभागाचे  इराप्पा करलिंगन्नावर, बीट फॉरेस्ट मल्लेश बिरादार, गिरीश मेक्कदे, कित्तूर देगांव वनविभागाचे कर्मचारी या कामात सहभागी झाले होते.