बेळगाव / प्रतिनिधी 

बेळगावचे पोलिस आयुक्त एस.एन.सिद्धरामप्पा यांनी, चालू वर्षात संपूर्ण जिल्ह्यात आणि शहरातील अपघात किमान २५% कमी करण्यासाठी आवश्यक ती सर्व पावले उचलावीत, अशा सूचना दिल्या आहेत. 

जिल्हाधिकारी कार्यालयाच्या सभागृहात आज सोमवारी  झालेल्या जिल्हा रस्ता सुरक्षा समितीच्या बैठकीत ते बोलत होते.विना हेल्मेट दुचाकी चालविणाऱ्यांचा वाहन परवाना निलंबित करण्याची कारवाई करण्याच्या सूचना त्यांनी अधिकाऱ्यांना दिल्या.

याशिवाय शहरातील निवडक महत्त्वाच्या ठिकाणी प्रीपेड ऑटोची व्यवस्था करण्यासाठी आवश्यक ती पावले उचलण्याचे त्यांनी सांगितले.शहरातील पदपथांवर बसणाऱ्या व्यावसायिकांकडून मनपा दंड वसूल करत असल्याने अशा व्यापाऱ्यांची सुटका करणे कठीण होत आहे. त्यामुळे महामंडळाने याकडे लक्ष द्यावे, असे सिद्धरामप्पा यांनी सांगितले. 

देशभरातील अपघातांचे प्रमाण कमी करण्यासाठी सर्वोच्च न्यायालय सातत्याने लक्ष ठेवून आहे. त्यामुळे संबंधित विभागाच्या अधिकाऱ्यांनी बैठकीला सक्तीने उपस्थित राहून त्यांना दिलेली कामे पुरेशा पद्धतीने पार पाडावीत, असे जिल्हा पोलिस अधीक्षक डॉ.भीमाशंकर गुळेद  यांनी सांगितले.

जिल्ह्यात गेल्या तीन वर्षांत १७ ब्लॅक स्पॉट्स आढळून आले आहेत. याठिकाणी अपघात टाळण्यासाठी पोलिस, सार्वजनिक बांधकाम आणि इतर संबंधित विभागाच्या अधिकाऱ्यांच्या संयुक्त पथकाने तपासणी करून योग्य त्या उपाययोजना कराव्यात, असेही ते म्हणाले.

महामार्ग किंवा जिल्हा मुख्य रस्त्यासह जंक्शन असलेल्या ठिकाणी पुरेशी प्रकाश व्यवस्था पुरविण्यात यावी ; रस्ता चांगला दिसावा यासाठी झाडे किंवा झुडपे तोडण्याचे निर्देश त्यांनी अधिकाऱ्यांना दिले.