बेळगावात पोलिसांकडून अंमली पदार्थांविरोधात जनजागृती रॅली

 

बेळगाव / प्रतिनिधी 

बेळगाव पोलीस आयुक्तालयातर्फे "व्यसनमुक्त बेळगाव शहर” अभियान राबविण्यात येत आहे. त्याअंतर्गत आज, शुक्रवारी शहर पोलीस आयुक्त एस. एन. सिद्धरामप्पा यांच्या नेतृत्वाखाली अंमली पदार्थ मुक्त जनजागृती रॅलीचे आयोजन करण्यात आले होते. या रॅलीमध्ये बेळगाव शहरातील विविध शाळा-महाविद्यालयातील विद्यार्थी सहभागी झाले होते. 

प्रारंभी चन्नम्मा चौकात रॅलीला चालना देताना पोलीस आयुक्त सिद्धरामप्पा म्हणाले , पोलीस विभागाने १ महिन्यापासून शहरातील सर्व शाळा आणि महाविद्यालयांमध्ये अंमली पदार्थ विरोधी जनजागृती मोहीम राबवली आहे.

अंमली पदार्थांचे व्यसन खूप घातक आहे. यात एकदा अडकल्यास बाहेर पडणे खूप कठीण असते. शालेय मुले, शिक्षक आणि पालकांनी मुलांना अंमली पदार्थ आणि व्यसनांचे दुष्परिणाम समजावून सांगावेत. व्यसनांपासून दूर राहिल्यास आपण चांगले जीवन घडवू शकतो, व्यसनमुक्त शहर घडवूया, असे शहर पोलीस आयुक्त एस. एन. सिद्धरामप्पा यांनी सांगितले. 

या व्यसनमुक्ती रॅलीमध्ये पोलीस आयुक्त एस. एन. सिद्धरामप्पा, उपायुक्त रोहन जगदीश, उपायुक्त पी. व्ही. स्नेहा, सहाय्यक पोलिस आयुक्त कोलकार, सदाशिव कट्टीमणी यांच्यासह शहरातील विविध पोलिस स्थानकांचे अधिकारी, हेड कॉन्स्टेबल तसेच शालेय विध्यार्थी-विद्यार्थिनी, शिक्षक हातात अंमली पदार्थांच्या विरोधात जागृती करणारे संदेश असलेले फलक घेऊन सहभागी झाले होते.