• सामाजिक कार्यकर्ते  शट्टूप्पा पाटील, अवधूत तुडवेकर यांचा पुढाकार 

सुळगा (हिं.) / वार्ताहर

कुटुंबियांशी झालेल्या वादातून रागाने घराबाहेर पडलेल्या आणि सुळगा (हिं.) (ता. बेळगाव) येथील वेंगुर्ला रोडवर आढळलेल्या त्या मनोरुग्ण युवकाची अखेर जिल्हा रुग्णालयात रवानगी करण्यात आली. रामशिष राकेश यादव (वय अंदाजे १८ रा. गोरखपूर, उत्तरप्रदेश) असे त्या युवकाचे नाव आहे.

याबाबत घटनास्थळावरून प्राप्त माहिती अशी की, रामशिष यादव हा मूळचा उत्तरप्रदेश येथील असून वडिलांशी वाद झाल्यानंतर रागाने तो घराबाहेर पडला. यावेळी मानसिक संतुलन बिघडल्याने कोणताही विचार न करता मिळेल त्या रेल्वेने प्रवास करत बेळगावला पोहोचला. शनिवार दि. २ डिसेंबर २०२३ रोजी रात्री भरकटल्याने तो सुळगा (हिं.) वेंगुर्ला मार्गावर वास्तव्यास होता. रविवारी सकाळी स्थानिक ग्रामस्थांनी चौकशी केली असता, त्याने शिवीगाळ करत दगड उचलून त्यांच्या अंगावर धावून जाण्याचा प्रयत्न केला. त्यामुळे परिसरात गोंधळ निर्माण झाला होता. 

दरम्यान ग्रा. पं. सदस्य महादेव कंग्राळकर व फकीरा कदम यांनी सदर घटनेची माहिती सुळगा येथील ग्रा. पं. सदस्य तथा सामाजिक कार्यकर्ते शट्टूप्पा (बाळू) पाटील यांना दिली. माहिती मिळताच शट्टूप्पा पाटील यांनी हायवे पेट्रोलिंग (महामार्ग गस्तीवरील) पोलिस आणि सामाजिक कार्यकर्ते अवधूत तुडवेकर यांच्याशी संपर्क साधला. यानंतर पोलिसांसह अवधूत तुडवेकर तातडीने घटनास्थळी दाखल झाले,आणि त्या युवकाची चौकशी केली. तसेच  त्याच्या कुटुंबियांशी संपर्क साधून सविस्तर हकिकत सांगितली . 

यावेळी सामाजिक कार्यकर्ते अवधूत तुडवेकर यांनी १०८ रुग्णवाहिकेला घटनास्थळी पाचारण केले. यानंतर पोलिसांच्या मदतीने ग्रा. पं. सदस्य तथा सामाजिक कार्यकर्ते शट्टूपा पाटील, सामाजिक कार्यकर्ते अवधूत तुडवेकर तसेच ग्रामस्थांनी रुग्णवाहिकेतून त्या युवकाची जिल्हा रुग्णालयात रवानगी केली. पोलिसांनी कुटुंबियांशी केलेल्या चर्चेनंतर रामशिषचा भाऊ त्याला गावी परत नेण्यासाठी बेळगावला रवाना होणार आहे अशी माहिती प्राप्त झाली आहे.