अक्कतंगेरहाळ येथे गॅस सिलेंडरचा स्फोट

• ९ महिन्यांच्या बाळासह ७ जण जखमी

गोकाक / वार्ताहर 

गॅस सिलिंडरचा स्फोट झाल्याने नऊ महिन्यांच्या बाळासह एकाच कुटुंबातील सात जण जखमी झाले. अक्कतंगेरहाळ (ता. गोकाक जि. बेळगाव) येथे शनिवारी रात्रीच्या सुमारास ही घटना घडली आहे.

याबाबत घटनास्थळावरून प्राप्त माहिती अशी की, रात्री जेवण आटोपून  सर्वजण झोपी गेले. काही वेळानंतर स्वयंपाकासाठी वापरण्यात येणाऱ्या गॅस सिलेंडरचा अचानकपणे वास येऊ लागला. हे लक्षात येताच घरच्यांनी उठून मोबाईल टॉर्चच्या प्रकाशझोत टाकताच स्फोट घडला असल्याची माहिती मिळाली आहे. यामध्ये ९ महिन्याच्या बाळासह ७ जण जखमी झाले असून यापैकी दोघांची प्रकृती गंभीर आहे. गंभीर असलेल्या दोघांना उपचारासाठी बेळगावच्या खासगी रुग्णालयात दाखल करण्यात आले आहे. अन्य जखमींवर गोकाक येथील रुग्णालयात उपचार करण्यात येत आहेत. स्फोटाची तीव्रता इतकी होती की, त्यामुळे घराची कौले उडून दूरवर पडली. स्फोटामुळे घरातील साहित्याचे देखील नुकसान झाले आहे. अंकलगी पोलीस स्थानकात या घटनेची नोंद झाली आहे.