खानापूर / प्रतिनिधी 

निपाणी बस स्थानकातून बेळगाव प्रवास करून पुढील प्रवासासाठी आळणावर बसमध्ये चढत असताना  खानापूर येथील महिलेच्या पर्स मधील चार तोळे सोन्याचे दागिने लंपास केल्याची घटना दोन दिवसांपूर्वी घडली आहे.

याबाबत प्राप्त माहितीनुसार, खानापूर येथील प्रतिभा मंजुनाथ सक्री नामक महिला बेळगाव येथून अळणावर बसने खानापूरला प्रवास करीत होती. त्यावेळी गर्दीचा फायदा घेत चोरट्यांनी सदर महिलेच्या पर्समधून चार तोळे सोन्याचे दागिने लंपास केले. मात्र सदर चोरीचा प्रकार महिलेच्या खानापूर येथील घरी आल्यानंतर उघडकीस आला.

यानंतर प्रतिभा सक्री तातडीने खानापूर पोलीस स्थानकात तक्रार नोंदवण्यासाठी दाखल झाल्या. मात्र खानापूर पोलिसांनी तुम्ही बेळगाव येथील मार्केट पोलीस स्थानकात तक्रार दाखल करा असे सांगितले. तर बेळगाव मार्केट पोलिसांनी चोरीचा प्रकार खानापूर पोलीस स्थानकाच्या हद्दीत घडल्यामुळे खानापूर पोलीस स्थानकात तक्रार नोंद करा असे सांगत तक्रार नोंदवून घेण्यास असमर्थता दर्शवली. त्यामुळे सक्री कुटुंबीयांना चोरी झालेल्या मनस्तापाबरोबरच पोलिसांच्या या वागण्याचा देखील नाहक मनस्ताप सहन करावा लागला आहे.

कर्नाटक सरकारच्या मोफत बस योजनेचा फटका प्रवाशांना सहन करावा लागत आहे. वाढत्या गर्दीचा फायदा घेत भुरटे चोर व खिसेकापुंचा   मुक्त संचार बस स्थानकावर वाढलेला आहे. सदर घटनेची नोंद दोन दिवसानंतर खानापूर पोलीस स्थानकात झाली आहे. याप्रकरणी पोलीस अधिक तपास करीत आहे.