गळा आवळून पतीचा खून ; पत्नीला अटक

• हिंडलगा कारागृहात रवानगी

• खानापूर तालुक्यातील घटना  

खानापूर / प्रतिनिधी 

पत्नीनेचं पतीचा गळा आवळून खून केल्याची धक्कादायक घटना  चिक्कमन्नोळी (ता. खानापूर) येथे उघडकीस आली आहे. या घटनेनंतर पोलिसांनी पत्नीला अटक करून न्यायालयासमोर हजर केले असता तिची हिंडलगा कारागृहात रवानगी करण्यात आली. बाबू कल्लाप्पा कर्की (वय ४८) असे मृत पतीचे नाव आहे. तर महादेवी बाबू कर्की असे आरोपी पत्नीचे नाव आहे. मृत बाबूला एक मुलगा व मुलगी आहे.

याबाबत घटनास्थळावरून प्राप्त माहितीनुसार, खानापूर तालुक्याच्या चिक्कमन्नोळी येथील रहिवासी बाबू कल्लाप्पा कर्की हा व्यसनाधीन होता.  त्याने शेती घाण ठेवून सावकारी कर्ज काढले होते. त्यामुळे पत्नी त्याच्या त्रासाला कंटाळली होती.

सोमवार दि. ३० ऑक्टोबर रोजी रात्री जेवणातून तिने पतीला झोपेच्या गोळ्या दिल्या. त्यानंतर गाढ झोपलेल्या पतीचा दोरीने गळा आवळून खून केला. त्यानंतर मंगळवारी सकाळी पती उठत नसल्याचे सांगून तिने शेजाऱ्यांना घरी बोलावले. शेजाऱ्यांनी त्याला उठवण्याचा प्रयत्न केला असता, त्याचा मृत्यू झाल्याचे निष्पन्न झाले. काही वेळात गावातील इतर लोकांनाही ही बातमी समजली. मात्र बाबू कर्की यांच्या गळ्याभोवती वळ उमटलेला दिसून आल्याने संशय निर्माण झाला होता. याबाबत मंगळवारी दिवसभर तर्कवितर्क लढवले जात होते.

अखेर नंदगड पोलिसांना ही घटना कळविण्यात आली. माहिती मिळताच नंदगड पोलिसांनी घटनास्थळी दाखल फोन मृतदेह ताब्यात घेऊन चौकशी केली. बाबू यांच्या गळ्यावर दोरीचे वळ उमटले असल्याने पोलिसांनी गतीने तपास केला. पोलीस चौकशीत पत्नीने स्वतः खून केल्याची कबुली दिली.

मंगळवारी सायंकाळी शवविच्छेदनानंतर मृतदेह नातेवाईकांच्या ताब्यात देण्यात आला. बाबू याच्या मुलीनेच पोलीस स्थानकात फिर्याद दाखल केली. पत्नी महादेवी हिला अटक करून बुधवारी रात्री उशिरा खानापूर न्यायालयाच्या न्यायाधीशांसमोर हजर केल्यानंतर, तिची हिंडलगा कारागृहात रवानगी करण्यात आली आहे.