• खुनाचा गुन्हा दाखल : कॅम्प पोलिसांची कारवाई 

बेळगाव / प्रतिनिधी 

कॅम्प परिसरात क्षुल्लक वादातून ॲरिकस्वामी अलेक्झांडर अँथोनी (वय २५ रा.अँथोनी स्ट्रीट कॅम्प) याचा खून केल्याप्रकरणी दोघा सख्ख्या भावांवर खुनाचा गुन्हा दाखल करून कॅम्प पोलिसांनी त्यांना ताब्यात घेतले. दोघांपैकी एक भाऊ अल्पवयीन आहे. यावेळी दोघांना न्यायालयासमोर हजर केले असता, युवकाची बालसुधारगृहात तर १८ वर्षाच्या भावाची कारागृहात रवानगी करण्यात आली आहे. शनिवारी रात्री ११.३० वा च्या सुमारास अँथोनी स्ट्रीट कॅम्प येथे ही घटना घडली. 

घटनेबाबत सविस्तर हकीकत अशी की, मृत ॲरिकस्वामी व खुनातील संशयित एकाच परिसरात राहतात. शनिवारी रात्री या प्रकरणातील अल्पवयीन युवक रस्त्यावर विनाकारण शिव्या देत थांबला होता. रस्त्याने जाणाऱ्या एकाने त्याला हटकून,'उगीचच का शिव्या देत थांबला आहेस घरी जा', असे सांगितले. यानंतरही तो शिव्या देतच होता. नेमका ॲरिकस्वामीच्या घराजवळ हा प्रकार सुरू होता. यावेळी ॲरिकस्वामी घरात जेवत होता. घरासमोर थांबून सदर युवक शिवीगाळ करत असल्याने तो बाहेर आला आणि अशी विनाकारण का शिवीगाळ करतोस, इथून निघून जा असे सांगून तो पुन्हा घरात गेला. यानंतर ॲरिकस्वामी बाहेर बोलावून घेत भावाला का ओरडलास असे म्हणत, दोघांमध्ये पुन्हा वाद झाला. यातून एकमेकांच्या अंगावर धावून जात मारहाण सुरू झाली. यावेळी धाकट्या भावाने ॲरिकस्वामीला  ढकलले. तो गटारीत जाऊन पडल्याने त्याच्या डोक्याला गंभीर दुखापत झाली मात्र उपचारावेळी त्याचा मृत्यू झाला. याप्रकरणी कॅम्पचे पोलीस निरीक्षक अल्ताफ मुल्ला व त्यांचे सहकारी अधिक तपास करीत आहेत.