टीम इंडियाचा पाकिस्तानवर ७ विकेट्सने दणदणीत विजय : हिटमॅन रोहितचे तुफानी अर्धशतक

• विश्वचषकातील टीम इंडियाची विजयी घौडदौड सुरू  

• ऑस्ट्रेलिया,अफगाणिस्ताननंतर आज पाकिस्तान चारीमुंड्या चीत 

अहमदाबाद दि. १४ ऑक्टोबर २०२३ : विश्वचषकातील १२ व्या सामन्यात पाकिस्तानने दिलेल्या १९२ धावांचे आव्हान पार करताना टीम इंडियाने दणदणीत विजय मिळवला आहे. याचबरोबर आयसीसी वर्ल्ड विश्वचषकामध्ये (ICC World Cup 2023) टीम इंडियाने आठव्यांदा पाकिस्तानचा पराभव केला आहे.

नरेंद्र मोदी स्टेडियमवर भारत आणि पाकिस्तान यांच्यात वर्ल्ड कपचा (World Cup 2023) १२ वा सामना खेळवला गेला. या सामन्यात टीम इंडियाने पाकिस्तानचा लाजीरवाणा पराभव केला आहे. पाकिस्तानने भारताला 192 धावांचे आव्हान दिले  होते. त्याला प्रत्युत्तर देताना टीम इंडियाने ७ गडी राखून सामना (India beat pakistan) जिंकला आहे. भारताकडून शार्दुल ठाकूर वगळता इतर पाच गोलंदाजांनी प्रत्येकी २-२ विकेट्स घेतल्या तर फलंदाजीमध्ये कॅप्टन रोहित शर्मा  (Rohit Sharma) चमकला. त्याने ६३ बॉलमध्ये ८६धावांची धुंवाधार खेळी केली अन् टीम इंडियाला विजय मिळवून दिला आहे.

पाकिस्तानने दिलेल्या १९२ धावांचे  आव्हान पार करताना भारताने प्रेशर घेतला नाही. पाकिस्तानच्या शाहिन शाह आणि हसन अलीला चोपण्यास सुरूवात केली. मात्र, मोठा शॉट मारण्याच्या नादात शुभमन गिल (Shubhman Gill) बॉल पॉईंटला उभ्या असलेल्या शाबादच्या हातात झेल देत तंबूत परतला. त्यानंतर विराट कोहलीने (Virat Kohli) पाकिस्तानला कव्हर ड्राईव्हचे जलवे दाखवले. विराट देखील एका खराब बॉलवर कॅच आऊट झाला. त्यानंतर मैदानात आलेल्या श्रेयस अय्यरने सावध सुरूवात करत रोहितला (Rohit Sharma) साथ दिली. रोहित बाद झाल्यानंतर श्रेयस अय्यर आणि केएल राहुल यांनी विजयाचे सोपस्कार पूर्ण केले.