• शहर पोलिस आयुक्तांची माहिती 
  • बेळगाव शहरातील सार्वजनिक श्री गणेशोत्सव मंडळांची संयुक्त बैठक 

बेळगाव / प्रतिनिधी 

बेळगाव शहरातील सार्वजनिक श्री गणेशोत्सव मंडळांना आगामी श्री गणेशोत्सवासाठी आवश्यक असणारी विविध खात्यांची लेखी परवानगी मिळण्यासाठी गणेशोत्सवापूर्वी १५ दिवस 'सिंगल विंडो' सुविधा सुरू करण्यात येणार आहे. तसेच गणेशोत्सव सुरळीत शांततेने पार पडावा यासाठी सर्व गणेशोत्सव मंडळांची संयुक्त बैठक घेण्याबरोबरच प्रत्येक पोलीस स्थानकाच्या हद्दीतील मंडळाच्या बैठका घेतल्या जातील अशी माहिती बेळगाव शहर पोलिस आयुक्त डॉ. एस. एन. सिद्धरामप्पा यांनी दिली.

आगामी श्री गणेशोत्सवाच्या पार्श्वभूमीवर आज मंगळवारी सकाळी पोलिस आयुक्तालयाच्या सभागृहात पोलिस अधिकारी आणि मध्यवर्ती सार्वजनिक श्री गणेशोत्सव महामंडळ व लोकमान्य टिळक सार्वजनिक श्री गणेशोत्सव महामंडळाच्या पदाधिकाऱ्यांची बैठक पार पडली. या बैठकीच्या अध्यक्ष स्थानावरून पोलिस आयुक्त बोलत होते. 

प्रारंभी कायदा व सुव्यवस्था विभागाचे उपायुक्त शेखर एच.टी. यांनी सर्वांचे स्वागत केले. यानंतर  महामंडळ जनसंपर्क विभागाचे प्रमुख विकास कलघटगी यांनी  'सिंगल विंडो' चा मुद्दा उपस्थित केला. शहरात ३७८ सार्वजनिक श्रीगणेशोत्सव मंडळे आहेत. त्यांच्या सोयीसाठी दरवर्षी 'सिंगल विंडो'  सुविधा दिली जाते. मात्र, पोलिसांव्यतिरिक्त हेस्कॉम, नगरपरिषद, वनविभाग आणि अन्य काही विभागांचे अधिकारी त्या ठिकाणी हजर असतातच असे नाही. त्यामुळे काम सोडून विविध परवानग्यांसाठी येणाऱ्या मंडळांच्या पदाधिकाऱ्यांना त्रास होत आहे. त्यासाठी संबंधित विभागाचे सर्व अधिकारी सिंगल विंडोच्या ठिकाणी ठराविक वेळी उपस्थित राहतील, अशी व्यवस्था करण्यात यावी. तसेच विविध परवानग्या मिळण्यात येणाऱ्या अडचणींबाबत अधिकाऱ्यांना माहिती द्यावी आणि परवानगी मिळण्याची प्रक्रिया सुलभ करण्यासाठी कठोर अटी लादण्यात येऊ नयेत. तसेच उत्सवाच्या पूर्वसंध्येला सिंगल विंडो सुविधा सुरू करण्याऐवजी सर्व मंडळांना १५ दिवस अगोदर चांगली सुविधा द्यावी, अशी मागणी त्यांनी केली. 

विकास कलघटगी यांच्या मागण्यांना तात्काळ सहमती दर्शवत पोलीस आयुक्त डॉ. एस. एन. सिद्धरामप्पा यांनी श्री गणेशोत्सवाच्या १५ दिवस आधि शहरातील आठही पोलिस स्टेशनच्या ठिकाणी सिंगल विंडो सुविधा सुरू करण्यात येणार आहे. गणेशोत्सव मंडळांना आवश्यक परवाना मिळविण्यात कोणतीही अडचण येणार नाही, याची काळजी घेतली जाईल, अशी ग्वाही त्यांनी दिली.

याशिवाय गणेशोत्सवादरम्यान उद्भवणाऱ्या समस्या सोडविण्यासाठी पोलीस, हेस्कॉम आणि वनविभाग यांच्यात समन्वय ठेवावा, असेही विकास कलघटगी यांनी सांगितले. बैठकीवेळी विकास कलघटगी  पुढे म्हणाले गणेशोत्सवा दरम्यान निर्माण होणाऱ्या समस्यांचे निवारण करण्यासाठी पोलिस हेस्कॉम आणि वनखात्यांमध्ये समन्वय राखला जावा. कारण श्री गणेशाच्या आगमन आणि विसर्जनाचा मार्ग पूर्वनियोजित असतानाही त्या मार्गावरील झाडाच्या फांद्या विजेच्या तारा वगैरे अडथळे संबंधित खात्याकडून दूर केले जात नाहीत. अडथळ्यामुळे एखादी दुर्घटना घडण्याची शक्यता असते.याकरिता संबंधित पोलीस अधिकाऱ्यांनी  ही बाब गांभीर्याने घेऊन  संबंधित विभागाकडून मार्गातील अडथळे दूर करण्याबरोबरच श्री गणेश आगमन व विसर्जन सोहळा सुरळीत होईल अशी व्यवस्था करावी अशी सूचना त्यांनी केली.

यावर पोलिस आयुक्तांनी यंदा गणेशोत्सव काळातच मुस्लिम बांधवांचा ईद-ए-मिलाद  हा सण आला आहे. त्यांची मिरवणूक दुपारपर्यंत संपते. शहरातील श्री सार्वजनिक गणेशोत्सव मंडळांनी मात्र विसर्जन मिरवणुकीमध्ये वेळेवर सहभागी व्हावे. मिरवणूक खंड न पडता सलग पार पाडावी. गणेशोत्सव काळात डॉल्बीचा वापर करू नये गणेशोत्सव सर्वांनी डॉल्बी विरहित साजरा करावा, असे आवाहन पोलीस आयुक्त डॉ. सिद्धरामप्पा यांनी केले.

बैठकीत मध्यवर्ती सार्वजनिक श्री गणेशोत्सव महामंडळाचे अध्यक्ष रमाकांत कोंडुसकर, कार्याध्यक्ष रणजीत चव्हाण - पाटील, लोकमान्य टिळक सार्वजनिक श्री गणेशोत्सव महामंडळाचे अध्यक्ष विजय जाधव, नगरसेवक गिरीश धोंगडी, नगरसेवक नितीन जाधव यांनी अन्य समस्या व सूचना मांडल्या.

शहरातील सार्वजनिक गणेशोत्सव मंडळांवर दडपशाही करू नये. गणेशोत्सव काळात स्थानिकांसह परगावचे लोक गणेश दर्शन आणि खरेदीसाठी येत असतात. त्यांच्याकरिता हॉटेल खानावळी खाद्यपदार्थांचे स्टॉल कपड्याची दुकाने रात्री उशिरापर्यंत सुरू ठेवण्यास परवानगी दिली जावी अशी मागणी या बैठकीत करण्यात आली. सदर मागणीची पूर्तता करण्याचे आश्वासन पोलिस आयुक्तांनी दिले.

यावेळी पोलीस आयुक्तांसह गुन्हे व वाहतूक विभागाच्या पोलीस उपायुक्त पी. व्ही. स्नेहा व मार्केट उपविभागाचे सहाय्यक पोलीस आयुक्त एन. व्ही. बरमनी यांनीही उपस्थित गणेशोत्सव महामंडळाच्या पदाधिकारी व सदस्यांना मार्गदर्शन केले. पोलीस उपायुक्त पी.व्ही.स्नेहा यांनी गणेश विसर्जन मिरवणुक सलग पार पाडण्यात यावी आणि गणेशोत्सव काळात प्रत्येक मंडळाने आपल्या भागात रहदारीस अडथळा निर्माण होणार नाही याची दक्षता घ्यावी असे आवाहन केले.

या बैठकीला खडेबाजार उपविभागाचे सहाय्यक पोलीस आयुक्त अरुण कुमार कोळळूर, बेळगाव ग्रामीण उपविभागाचे सहाय्यक पोलीस आयुक्त एस. व्ही. गिरीश, गुन्हे अन्वेषण विभागाचे सहाय्यक पोलीस आयुक्त सदाशिव  कट्टीमनी, खडेबाजार पोलिस स्थानकाचे निरीक्षक दिलीप निंबाळकर, पोलीस निरीक्षक जे. एम. कालीमिर्ची यांच्यासह वरिष्ठ पोलिस अधिकारी आणि सार्वजनिक श्री गणेशोत्सव महामंडळाचे कार्यकारी सचिव आनंद आपटेकर, उपाध्यक्ष सागर पाटील, सेक्रेटरी गणेश दड्डीकर, कपिल भोसले, माजी नगरसेवक राजीव बिर्जे, माजी उपमहापौर संजय शिंदे, हेमंत हावळ, सुनील जाधव, रोहित हावळ आणि पदाधिकारी व सदस्य उपस्थित होते.