चिक्कोडी / वार्ताहर 

दुचाकी आणि मालवाहतूक करणारा टेम्पो यांची धडक होऊन झालेल्या अपघातात दुचाकी वरील तिघेजण गंभीर जखमी झाले. चिक्कोडी तालुक्यातील नागरमुन्नोळीनजीक काल  सायंकाळच्या  सुमारास ही घटना घडली. दस्तगीर हसन मुल्तानी, श्रीकांत यल्लाप्पा कांबळे यांच्यासह अन्य एकजण या अपघातात गंभीर जखमी झाले.

याबाबत घटनास्थळावरून प्राप्त माहितीनुसार, श्रीकांत, दस्तगीर यांच्यासह अन्य एक जण दुचाकीवरून नागरमुन्नोळीच्या दिशेने निघाले होते. याचवेळी पाठीमागून येणाऱ्या मालवाहक टेम्पोची दुचाकीला जोरदार धडक बसून अपघात झाला. जखमींना अधिक उपचारासाठी बेळगाव येथील खासगी रुग्णालयात दाखल करण्यात आले. अपघातानंतर मालवाहू टेम्पोचा चालक वाहन सोडून फरार झाला आहे.

अपघाताची माहिती मिळताच चिक्कोडी वाहतूक पोलीस स्थानकाचे उपनिरीक्षक अमीनबावी यांनी घटनास्थळी भेट देऊन पंचनामा केला. या प्रकरणाची चिक्कोडी वाहतूक पोलीस स्थानकात नोंद झाली असून पोलीस फरार टेम्पो चालकाचा शोध घेत आहेत.