जलवाहिनी घालण्यासाठी खोदण्यात आलेल्या चरित अडकल्याने गाईचा दुर्दैवी मृत्यू

बेळगाव / प्रतिनिधी 

जलवाहिनी घालण्यासाठी रस्त्याकडेने खोदण्यात आलेल्या मोठ्या चरित कोसळून अडकून पडलेल्या दोन गाईंपैकी एका गाईचा दुर्दैवी मृत्यू झाल्याची घटना  गणेशपुर रोडवरील मिलिटरी फार्म जवळ आज घडली.

गणेशपुर रोडवरील मिलिटरी फॉर्म समोरील रस्त्याच्याकडेने मोठी जलवाहिनी घालण्याचे काम सुरू आहे. यासाठी खोल मोठी चर खोदून ठेवण्यात आली असून काम अपूर्ण असल्यामुळे चर बुजविण्यात आलेली नाही. या खोदलेल्या धोकादायकचारीमध्ये दोन गाई कोसळून अडकून पडल्या होत्या. याबाबतची माहिती मिळताच संतोष दरेकर, नरेश निलजकर, अवधूत तुडवेकर, सौरभ सावंत, वरूण कारखानीस, आतिश धटोंबे आदींनी घटनास्थळी धाव बचावकार्य हाती घेतले. या कार्यकर्त्यांनी चरित खोल खाली कोसळलेल्या गाईंना दोरीला पट्टा बांधून जेसीबीच्या साह्याने बाहेर काढले.

याप्रसंगी पोलिसांसह लष्करी जवान उपस्थित होते. चरीतून बाहेर काढलेल्या दोन गाईंपैकी एका गाईला गंभीर दुखापत होऊन बराच काळ अडकून पडल्यामुळे एका गाईचा मृत्यू झाला होता. त्या मृत गाईवर रस्त्या शेजारीच मोकळ्या जागेत खड्डा खोदून अंत्यसंस्कार करण्यात आले. गाईचे अंतिम विधी रहदारी पोलीस श्रीधर कुटोळी यांनी केले. गाईंच्या बाबतीत घडलेल्या दुर्घटनेमुळे  या मार्गावरून ये जा करणाऱ्या नागरिकांनी हळहळ व्यक्त केली.