गोकाक / वार्ताहर 

सार्वजनिक बांधकाम विभागात निकृष्ट काम करणाऱ्या कंत्राटदारांची यादी तयार करा. तसेच चांगले काम करणाऱ्या कंत्राटदारांनाच काम देऊन दर्जेदार रस्ते बांधण्याची कार्यवाही करावी. दर्जेदार कामे न झाल्यास संबंधित अधिकाऱ्यांवर कारवाई करण्यात येईल, असा इशारा सार्वजनिक बांधकाम मंत्री सतीश जारकीहोळी यांनी अधिकारी आणि ठेकेदारांना दिला. 

गोकाक शहरातील तालुका पंचायत सभागृहात आज  बुधवारी गोकाक व मुडलगी तालुक्याची प्रगती आढावा बैठक झाली. त्या  बैठकीच्या अध्यक्षस्थानावरून ते बोलत होते. यावेळी ते पुढे म्हणाले, एकदा रस्ता झाला की तो किमान १० वर्षे टिकेल अशा पद्धतीने तयार करावा. गोकाक व मुडलगी तालुक्यात प्राधान्याने कामे करून जनतेच्या हिताची कामे हाती घ्यावीत. लोळसुर पूल, वसतिगृहे, न्यायालयाची इमारत या कामांना अधिक महत्त्व देण्याबरोबरच विभागातील प्रलंबित कामांना प्राधान्य देऊन ग्रामीण भागाला जोडणारे रस्ते लवकर पूर्ण करावेत, असे त्यांनी सांगितले. 

तालुक्यात सुरू असलेल्या कामांची सर्वस्वी जबाबदारी अधिकारी आणि ठेकेदारांची आहे. गोकाक नगर नाका क्र. १ ते डीवायएसपी कार्यालयापर्यंत बांधण्यात आलेला नाला रस्त्यापेक्षा २ फूट उंच असून, पावसाच्या पाण्याची समस्या आढळल्यास कंत्राटदारांवर कडक कारवाई करण्यात येईल असा इशारा त्यांनी दिला. 

या बैठकीला गोकाकचे तहसीलदार के मंजुनाथ, मुडलगी तहसीलदार प्रशांत चन्नगोंडा, गोकाक तालुका पंचायतीचे मुख्य कार्यकारी अधिकारी मुरलीधर देशपांडे, मुडलगी तालुका पंचायतीचे मुख्य कार्यकारी अधिकारी चन्ननवर उपस्थित होते.