• मंत्री सतीश जारकीहोळी यांच्या संबंधित विभागाच्या अधिकाऱ्यांना सूचना 
  • जिल्ह्याच्या विकासासंदर्भात सुवर्णसौध येथे आढावा बैठक  

बेळगाव / प्रतिनिधी  

पावसाळा सुरू होत असल्याने उद्यापासून बेळगाव, जिल्ह्यातील सर्व स्थानिक आमदारांना माहिती देऊन  शेतकऱ्यांना बी-बियाणे व खताचे वाटप सुरू करावे, अशा सूचना सार्वजनिक बांधकाम विभागाचे मंत्री सतीश जारकीहोळी यांनी संबंधित विभागाच्या अधिकाऱ्यांना दिल्या. बेळगाव जिल्ह्याच्या विकासासंदर्भात आज सुवर्ण विधानसौध येथे आढावा बैठक पार पडली. या बैठकीच्या अध्यक्ष स्थानावरून ते बोलत होते.  बियाणे खरेदीसाठी शेतकऱ्यांना दूरवर जावे लागू नये याकरिता बियाणे शक्य तितक्या जवळ उपलब्ध करून देण्याची व्यवस्था करावी असे ते म्हणाले.

शेतकरी आत्महत्या प्रकरणातील नुकसान भरपाई प्रलंबित असल्यास ती तात्काळ देण्यात यावी. आत्महत्येची नोंद होताच, शवविच्छेदन तपासणी करून सुटका करण्यात यावी. याबाबत तहसीलदार व संबंधित अधिकार्‍यांनी त्वरीत प्रतिसाद द्यावा. नैसर्गिक आपत्तीमुळे जनावरांचा अपघाती मृत्यू झाल्यास अधिकार्‍यांनी संबंधित मालकांच्या घरी जाऊन नुकसान भरपाई मिळवून द्यावी. कारण भरपाई मिळण्याची प्रक्रिया माहीत नसल्यामुळे बरेच शेतकरी यापासून वंचित राहतात. 

शाळा सुरू होत असल्याने अतिथी शिक्षक नेमण्याची प्रक्रिया सुरू करावी, अशा सूचना त्यांनी केल्या. मोडकळीस आलेल्या शाळांच्या इमारती मोकळ्या कराव्यात, असे ते म्हणाले. जिल्ह्यातील प्रत्येक प्राथमिक आरोग्य केंद्रात अत्यावश्यक औषधांचा साठा उपलब्ध असला पाहिजे. बेळगावच्या सुपर स्पेशालिटी हॉस्पिटलला आवश्यक यंत्रसामग्री उपलब्ध करून दिली जाईल आणि ते लवकरात लवकर सुरू करण्यासाठी कार्यवाही केली जाईल. जिल्ह्याचे काम वेळेत पूर्ण करावे. कामाला जितका विलंब होईल तितकी पिण्याच्या पाण्याची समस्या वाढणार आहे. त्यामुळे कोणत्याही कारणाने कामाला विलंब होऊ नये  यासाठी अधिकाऱ्यांनी सातत्याने देखरेख करून वेळेत कामे पूर्ण करावीत, असे निर्देश मंत्री जारकीहोळी यांनी अधिकाऱ्यांना दिले. बेळगाव शहराच्या पिण्याच्या पाणीपुरवठ्यासह इतर महत्त्वाच्या प्रश्नांवर स्वतंत्र बैठक घेऊन आवश्यक ती पावले उचलली जातील.अधिकाऱ्यांनी कामाला लागावे. नवीन सरकारच्या इच्छेनुसार जनतेला चांगले प्रशासन देणे हे सरकारचे कर्तव्य आहे. अधिकाऱ्यांनी जोमाने काम करावे. कृतीशील अधिकाऱ्यांना काम करण्यास प्रोत्साहन दिले जाईल, असे आश्वासनही  मंत्री सतीश जारकीहोळी यांनी दिले.  

या बैठकीत पुढे महिला व बालविकास मंत्री लक्ष्मी हेब्बाळकर यांनी अपंग व्यक्तींचे सक्षमीकरण आणि ज्येष्ठ नागरिक विभागात काही तांत्रिक कारणांमुळे नुकसान भरपाई जाहीर करण्यात अडथळे येत आहेत. जिल्ह्यातील आत्महत्या केलेल्या शेतकऱ्यांच्या कुटुंबीयांना तातडीने नुकसान भरपाई द्यावी, ठिबक सिंचन योजनेचे लाभार्थी निवडताना संबंधित मतदारसंघातील आमदारांच्या निदर्शनास आणून द्यावेत, असे त्यांनी सांगितले. रोजगार हमी योजनेंतर्गत झालेल्या कामांचा शेतकऱ्यांना फायदा झाला पाहिजे. शाळा सुरू होत असल्याने आवश्यक असलेल्या शाळांना डेस्क व इतर फर्निचर देण्यात यावे, त्यांनी प्रस्ताव सादर करून प्राथमिक आरोग्य केंद्रांच्या दुरुस्तीबाबत माहिती दिल्यास त्यांना मान्यता मिळेल. शासकीय स्तरावर सांबरा येथे ३५०० बीपीएल कार्डधारक असून, जादा रेशन दुकाने उघडण्यात यावीत, अंगणवाडी केंद्रे सुरू करावित, अशा सूचना त्यांनी अधिकाऱ्यांना दिल्या. घटनास्थळाची आवश्यक माहिती तात्काळ घेऊन कार्यवाही करावी, असे त्यांनी जिल्हाधिकाऱ्यांना सांगितले. तात्काळ जागा उपलब्ध करून द्यावी. महसूल, ग्रामविकास आणि महिला व बालविकास विभागाच्या अधिकाऱ्यांनी एकत्रित बैठक घेऊन अंगणवाडी केंद्र स्थापनेसाठी जागा उपलब्ध करून द्यावी.संभाव्य पुराच्या व्यवस्थापनासाठी आवश्यक ती तयारी करावी, असेही त्यांनी स्पष्ट केले. चंदनहोसूर, बेक्किनकेरी, बेनकनहळ्ळी यासह काही गावांना पिण्याच्या पाण्याची समस्या भेडसावत असून, अधिकाऱ्यांनी टँकरद्वारे पिण्याच्या पाण्याचा  पुरवठा करावा, जनतेच्या अपेक्षा पूर्ण कराव्या लागतील. अधिकाऱ्यांनी लोकांच्या समस्या जाणून घ्याव्यात, असे मंत्री लक्ष्मी हेब्बाळकर यांनी अधिकाऱ्यांना सांगितले.

बैलहोंगलचे आमदार महांतेश कौजलागी म्हणाले की, पीकेपीएसद्वारे पेरणीच्या बियाण्यांचे वाटप सुरु  करावे.  शेतात वीज पडून जळत असताना नैसर्गिक आपत्तीच्या मार्गदर्शक सूचनांनुसार तातडीने मदत देण्यात यावी, अशा सूचना त्यांनी मंत्र्यांना केल्या. रेशीम विभागाच्या सहसंचालकांचे कार्यालय बेळगावहून हावेरी जिल्ह्यात स्थलांतरित  करण्यात आले आहे. त्यामुळे सहसंचालक कार्यालय पुन्हा बेळगावला आणावे, अशी मागणी त्यांनी बैठकीत केली.

नियुक्त अतिथी शिक्षक नेमताना ग्रामीण भागातील ज्या शाळांमध्ये शिक्षकांची कमतरता आहे, अशा शाळांना प्राधान्य देण्यात यावे असेही आमदार महांतेश कौजलगी म्हणाले. 

शेतकरी संपर्क केंद्रांसह एकूण 170 केंद्रांद्वारे पेरणी बियाणांचे वाटप करण्यात येत असल्याचे जिल्हाधिकारी नितेश पाटील यांनी सांगितले. 

बेळगाव उत्तरचे आमदार आसिफ (राजू) सेठ म्हणाले की, फलोत्पादन विभागाच्या कोणत्याही योजनेंतर्गत लाभार्थ्यांची निवड जिल्हाधिकार्‍यांच्या अध्यक्षतेखालील समितीमार्फत करण्यात यावी.ज्या ठिकाणी शिक्षकांची कमतरता असेल तेथे अतिथी शिक्षकांची पदे तातडीने भरण्यात यावीत, अशी मागणी त्यांनी केली.  

या बैठकीला बाबासाहेब पाटील, विधानपरिषद सदस्य चन्नराज हट्टीहोळी, डॉ. साबण्णा तळवार आदी उपस्थित होते.