• सुमारे २५ लाखाचे नुकसान 

बेळगाव / प्रतिनिधी

शॉर्टसर्किटमुळे मेणसी गल्ली येथील  एका नोव्हेल्टी दुकानाला आग लागून  स्टेशनरीसह दुकानातील सजावटीचे साहित्य जळून भस्मसात झाल्याने  लाखो रुपयांचे नुकसान झाल्याची घटना आज आज सोमवारी सकाळच्या सुमारास घडली. या घटनेत महिपाल सिंग यांच्या मालकीच्या उत्तम नोव्हेल्टी या दुकानाचे मोठे नुकसान झाले आहे. शहरातील मेणसी गल्ली येथे मुख्य रस्त्यालगत आत गेलेल्या बोळ सदृश्य रस्त्यावर छोट्या दुकानांची रांग आहे. या दुकानांपैकी उत्तम नोवेल्टी या दुकानाला आज  शॉर्ट सर्किटमुळे आग लागली. रस्त्यावरून ये-जा करणाऱ्या आणि आसपासच्या नागरिकांनी दुकानातून धूर येत असल्याचे पाहून अग्निशामक दलाला माहिती दिली.


माहिती मिळताच अग्निशामक दलाच्या जवानांनी पाण्याच्या बंबासह तात्काळ घटनास्थळी धाव घेतली. आग आसपासच्या दुकानात पसरण्याचा धोका असल्यामुळे घटनास्थळी दाखल झालेल्या अग्निशामक दलाच्या जवानांनी पाण्याच्या जोरदार फवाऱ्याद्वारे नोवेल्टी दुकानातील आग आटोक्यात आणली. मात्र तोपर्यंत दुकानातील स्टेशनरी सह सजावटीचे साहित्य वगैरे सर्व काही आगीत भस्मसात होऊन लाखो रुपयांचे नुकसान झाले होते. या प्रकरणाची मार्केट पोलीस स्थानकात नोंद करण्यात आली आहे.