सीबीएससी राष्ट्रीय जलतरण स्पर्धेत बेळगावच्या जलतरणपटूंचे सुयश

बेळगाव / प्रतिनिधी  

गुजरात येथे नुकत्याच पार पडलेल्या सीबीएससी राष्ट्रीय जलतरण अजिंक्यपद स्पर्धेत बेळगावच्या स्विमर्स क्लब आणि एक्वेरियस क्लबचे होतकरू जलतरणपटू अद्वैत दळवी व वेदांत मिसाळे यांनी अभिनंदन यश मिळविले आहे. 

गुजरात येथील जीनियस इंग्लिश मीडियम स्कूल राजकोट येथे गेल्या 21 व 23 जानेवारी रोजी सीबीएसई राष्ट्रीय जलतरण अजिंक्यपद स्पर्धा पार पडली. या स्पर्धेतील मुलांच्या 50 मी. बॅकस्ट्रोक शर्यतीत अद्वैत दळवी याने सुवर्णपदक तर वेदांत मिसाळे याने 50 मी. बटरफ्लाय स्ट्रोक शर्यतीत रौप्य पदक पटकावले. हे दोन्ही जलतरणपटू शहरातील सुवर्ण जेएनएमसी जलतरण तलावामध्ये जलतरण प्रशिक्षक अक्षय शेरेगार, अजिंक्य मेंडके, नितीश कुडूचकर, गोवर्धन काकतकर आणि इमरान उचगावकर यांच्या मार्गदर्शनाखाली पोहण्याचा सराव करतात. अद्वैत दळवी हा केएलईएस इंटरनॅशनल स्कूलचा विद्यार्थी असून वेदांत मिसाळे हा ज्योती सेंट्रल स्कूलमध्ये शिकत आहे. या दोन्ही जलतरणपटूंना त्यांच्या पालकांसह केएलई संस्थेचे चेअरमन डॉ. प्रभाकर कोरे, रो. अविनाश पोतदार, जयभारत फाउंडेशनचे अध्यक्ष जयंत हुंबरवाडी, माणिक कापडिया, लता कित्तूर, उमेश कलघटगी, सुधीर कुसाणे आणि प्रसाद तेंडुलकर यांचे प्रोत्साहन लाभत आहे. राष्ट्रीय स्पर्धेतील यशाबद्दल अद्वैत दळवी व वेदांत मिसाळे यांचे सर्वत्र अभिनंदन होत आहे.