बेळगाव / प्रतिनिधी

भाग्यनगर अनगोळ १० व्या क्रॉसनजीक मालवाहू टिप्परची धडक बसून शाळकरी मुलगा जागीच ठार झाला. आज शुक्रवारी सायंकाळी  ५ वा. सुमारास हा अपघात घडला.

याबाबत प्राप्त माहितीनुसार, शाळा सुटल्यानंतर सायकलवरून घरी जात असताना टिप्परने या विद्यार्थ्याला जोराची धडक दिली. या धडकेत त्याचा दुर्दैवी मृत्यू झाला आहे. या घटनेने परिसरात हळहळ व्यक्त होत आहे.

या अपघाताची माहिती मिळताच पोलिसांनी तातडीने घटनास्थळी धाव घेतली. प्रदीप शिंदे (वय १२, रा. रोहिदास कॉलनी चौथे रेल्वे गेट अनगोळ, बेळगाव) असे त्या दुर्दैवी विद्यार्थ्याचे नाव असून तो शानभाग शाळेत शिकत होता.

या प्रकरणाची वाहतूक दक्षिण पोलीस स्थानकात नोंद झाली असून  संबंधित टिप्पर चालकावर गुन्हा दाखल करण्यात आला आहे.