कोल्हापूर / प्रतिनिधी 

बेळगावात महाराष्ट्र एकीकरण समितीच्या काळा दिन कार्यक्रम आणि सायकल फेरीत सहभागी होणार असल्याच्या शिवसैनिकांची बेळगाव पोलिसांनी चांगलीच धास्ती घेतली आहे.सीमाभागात गेल्या 65 वर्षांपासून दडपशाही करणाऱ्या कर्नाटक सरकारने शिवसेना ठाकरे गटाची बेळगावच्या दिशेने रवाना झालेली मशाल रॅली कोगनोळीजवळ अडवली. कर्नाटक सरकारची दडपशाही गृहित धरून शिवसैनिकांनी गनिमी काव्याने रॅली नेण्याचा निर्धार केला आहे. संयुक्त महाराष्ट्र चळवळीला बळ देण्यासाठी शिवसेनेकडून ‘दिवस वेदनांचा, दौड मशालीची’ या रॅलीचे आयोजन करण्यात आले आहे.

मशाल रॅली अडवण्यात आल्यानंतर ‘बेळगाव आमच्या हक्काचे, नाही कुणाच्या बापाचे’, ‘शिवाजी महाराज की जय’ म्हणत शिवसैनिकांनी परिसर दणाणून सोडला. रॅली अडवण्यात आल्यानंतर शिवसैनिकांनी महामार्गावरच ठाण मांडले.

यावेळी बोलताना शिवसेना जिल्हाप्रमुख संजय पवार म्हणाले की, हे एक दडपशाहीचे उदाहरण आहे. आम्ही मशाल पेटवली आहे, मराठी बांधवाना ताकद देण्याचे काम करत असताना हे दादागिरी करत आहेत. यांनी आज अडवले असले, तरी उद्या मशाल आणि भगवा झेंडा बेळगावात पोहोचेल, असा निर्धार संजय पवार यांनी व्यक्त केला.

संयुक्त महाराष्ट्र चळवळीला बळ देण्यासाठी शिवसेनेकडून ‘दिवस वेदनांचा, दौड मशालीची’ या रॅलीचे आयोजन केले आहे. या रॅलीत सुमारे एक हजारो शिवसैनिक सहभागी होणार असल्याची माहिती जिल्हाप्रमुख संजय पवार आणि विजय देवणे यांनी दिली आहे.

पोलिसांकडून तगडा बंदोबस्त

कर्नाटक सरकारची सीमाभागातील दडपशाही नवीन नाही. आज शिवसेनेची मशाल रॅली येणार असल्याच्या पार्श्वभूमीवर कर्नाटक पोलिसांकडून कोगनोळी टोलनाक्यावर तगडा बंदोबस्त ठेवण्यात आला आहे. रॅलीने बेळगावमध्ये प्रवेश करू नये, यासाठी हा बंदोबस्त तैनात करण्यात आला आहे.

प्रारंभी कोल्हापुरातील शाहू समाधीस्थळापासून मशाल रॅलीला सुरुवात करण्यात आली. धगधगती मशाल आणि भगवा झेंडा घेवून काळ्या पट्ट्या बांधून रॅली बेळ्गावच्या दिशेने रवाना झाली होती. कोल्हापुरातून निघालेली ही रॅली  कागल, कोगनोळी, निपाणी, संकेश्वर, हत्तरगीमार्गे बेळगावमध्ये पोहोचण्याचे नियोजन आहे. रॅलीत ठिकठिकाणी कार्यकर्तें सहभागी होणार आहेत.