• विठ्ठल-रुक्मिणी भजनी मंडळाची परंपरा
  • सन 1985 पासून अविरत पायी दिंडी 




सुळगा (हिं.) / वार्ताहर 

सालाबाद प्रमाणे यंदाही पवित्र श्रावण महिन्यानिमित्त विठ्ठल-रुक्मिणी भजनी मंडळ सुळगा (हिं.) यांच्या वतीने आज सोमवार दि. 8 ऑगस्ट रोजी पवित्र तीर्थक्षेत्र वैजनाथ येथे पायी दिंडीचे आयोजन करण्यात आले होते. प्रारंभी सकाळी 8 वाजता गावातील विठ्ठल मंदिरात देव विठ्ठल-रुक्मिणीचे पूजन करण्यात आले.




प्रास्ताविक करताना अजित कलखांबकर यांनी पायी दिंडीची परंपरा सांगितली. सन 1985 पासून प्रतिवर्षी विठ्ठल-रुक्मिणी भजनी मंडळ सुळगा (हिं.) यांच्या वतीने विठ्ठल मंदिरात दररोज पहाटे काकडा, भजन,आरती असे विविध धार्मिक कार्यक्रम होत असतात. वारकरी बंधू-भगिनी व भाविकांच्या उपस्थितीत अतिशय उत्साही, भक्तीमय वातावरणात हा सोहळा संपन्न होतो. श्रावणातील तिसऱ्या सोमवारी विठ्ठल मंदिर ते तीर्थक्षेत्र वैजनाथ येथे पायी दिंडीने जाऊन वैजनाथाचे दर्शन घेण्यात येते. दर्शनानंतर भजन करून महाप्रसादाने या दिंडीची सांगता होते. हा सर्व कार्यक्रम गावातील जेष्ठ वारकरी ह.भ.प. रवळू यल्लाप्पा चौगुले यांच्या मार्गदर्शनाखाली पार पडतो. पवित्र श्रावण महिन्यातील या काकड आरती, पायी दिंडीमुळे गावातील सर्व समाजामध्ये देवाप्रती भक्ती, थोर संतांची शिकवण व त्यांचे कार्य समाज प्रबोधन करण्यास महत्त्वाचे ठरते. त्यामुळे लहान मुले व युवा पिढीवर चांगले संस्कार होतात असेही अजित कलखांबकर यावेळी बोलताना म्हणाले.

यावेळी ह.भ.प. मल्लाप्पा भैरू पाटील यांच्या हस्ते वीणा पूजन करण्यात आले. तसेच आजच्या पायी दिंडीसाठी प्रसादाचे सर्व साहित्य उपलब्ध करून दिल्याबद्दल  ह.भ.प. अशोक परशराम पाटील यांच्या हस्ते शाल,श्रीफळ व पुष्पहार देऊन त्यांचा सत्कार करण्यात आला. त्याचप्रमाणे ज्येष्ठ वारकरी ह.भ.प. रवळू यल्लाप्पा चौगुले यांचाही ह.भ.प. अशोक पाटील यांच्या हस्ते सत्कार करण्यात आला.



यानंतर गावातील सर्व वारकऱ्यांच्या उपस्थित दिंडी तीर्थक्षेत्र वैजनाथकडे मार्गस्थ झाली. वरुण राजाची दमदार हजेरी असतानाही नेहमीच्याच उत्साहात सर्व वारकरी बंधू-भगिनी टाळ-मृदंगाच्या गजरात व विठू नामाच्या जयघोषात दिंडीत सहभागी झाले होते.

दुपारी तीर्थक्षेत्र वैजनाथ येथे दर्शन घेऊन भजन करण्यात आले. एकादशी असल्याने महाप्रसादाऐवजी खिचडी व चहापानानंतर या दिंडीची सांगता झाली.