• बालचमूंना रंगोत्सवाचे वेध  
  • बाजारपेठेत रंग, मुखवटे, पिचकाऱ्यांसह विविध साहित्याची खरेदी  

बेळगाव / प्रतिनिधी  

बेळगावकरांना रंगोत्सवाचे वेध लागले आहेत. उद्या शुक्रवार दि.१४ रोजी शहर व उपनगरात रंगोत्सव साजरा होणार आहे. या पार्श्वभूमीवर आज गुरुवार दि. १३ रोजी रंग, मुखवटे, टिमक्या ढोलकी व इतर साहित्य खरेदी करण्यासाठी बालचमूंची बाजारपेठेत गर्दी झाली होती. 

शहर आणि उपनगरात आज गुरुवार दिनांक १३ रोजी होळी सण साजरा होत असून परंपरेप्रमाणे दुसऱ्या दिवशी शुक्रवारी धूलिवंदन आहे. यानिमित्ताने शहर परिसरात होळी कामाण्णा मूर्तीला नैवेद्य दाखवून होळी पेटवण्यात आली. पौर्णिमेच्या मुहूर्तावर होळीनंतर रंगोत्सव साजरा केला जाणार आहे. रंगोत्सवाच्या पूर्वसंध्येला गल्लोगल्ली बालचमू व युवावर्ग मंडप घालण्यासह रंगपंचमीच्या तयारीत व्यस्त होते. त्याचबरोबर ठिकठिकाणी लहान मुले टिमक्या ढोलकी आणि ढोल वाजवताना दिसून आली. रसायन मिश्रित रंगांचा वापर न करता कोरड्या रंगांचा वापर करावा, पाण्याची नासाडी करण्यात येऊ नये असे आवाहन केले जात आहे. 

होळी हा सण आनंदाचा उत्साहाचा आणि रंगांचा सण म्हणून साजरा केला जातो. होळीला पुरणपोळीचा नैवेद्य अर्पण केला जातो, त्यामुळे हरभरा डाळ, मूग तसेच नारळांचीही मोठ्या प्रमाणात खरेदी झाली.

  • पांगुळ गल्लीत सामूहिक लोटांगण कार्यक्रम : 

बेळगावचे आकर्षण असलेल्या पांगुळ गल्लीत सामुहिक लोटांगण कार्यक्रम शुक्रवारी होणार आहे. अश्वत्थामा मंदिरासमोर हा लोटांगण कार्यक्रम होणार असून शहरात देखील विविध ठिकाणी रंगोत्सव कार्यक्रमाचे आयोजन करण्यात आले आहे. रंगोत्सव अवघ्या काही तासांवर येऊन ठेपला असतानाच बुधवारपासूनच शहर परिसरात बालचमू रंग खेळताना दिसत होते.