देहूत जगद्गुरू संत तुकोबांच्या वंशजाची आत्महत्या

देहू : देहूत संत तुकाराम महाराजांचे अकरावे वंशज ह.भ.प. शिरीष महाराज मोरे यांनी आत्महत्या केली आहे. त्यांच्या पश्चात आई - वडील असा परिवार आहे. 

पोलिसांनी दिलेल्या माहितीनुसार, शिरीष महाराज यांनी आज सकाळी साडेआठच्या सुमारास राहत्या घरी उपरण्याने गळफास घेऊन आत्महत्या केली आहे. आत्महत्येपूर्वी शिरीष महाराज यांनी चिठ्ठी लिहून ठेवली आहे. आर्थिक विवंचनेतून हे पाऊल उचलल्याचे चिठ्ठीत नमूद करण्यात आले आहे. वीस दिवसांपूर्वी त्यांचा साखरपुडा झाला होता तर एप्रिल महिन्यात त्यांचा विवाह होणार होता.

दरम्यान, काल रात्री जेवण केल्यानंतर शिरीष महाराज मोरे झोपायला गेले होते. मात्र सकाळी खोलीचे दार उघडले नाही. त्यामुळे दार तोडले असता त्यांनी उपरण्याच्या साह्याने गळफास घेतल्याचे समोर आले. ह.भ.प शिरीष महाराज हे प्रसिद्ध प्रवचन आणि कीर्तनकार त्याचप्रमाणे शिव व्याख्याते देखील होते. या घटनेने मोरे कुटुंबियांसह संपूर्ण देहू गावावर दुःखाचा डोंगर कोसळला आहे.