खानापूर / प्रतिनिधी 

नंदगड (ता. खानापूर) येथे गेल्या चार दिवसांपासून हजारो भाविकांच्या उपस्थितीत सुरू असलेल्या श्री महालक्ष्मीच्या रथोत्सवाची आज रविवारी सायंकाळी ठीक चार सांगता होऊन देवी गदगेवर विराजमान झाली. गदगेवर श्रीमहालक्ष्मीसाठी अयोध्येतील श्रीराम मंदिर उभारण्यात आले असून भाविकांसाठी हे खास आकर्षण आहे.

बुधवारी अक्षतारोपण झाल्यानंतर चार दिवस रथात विराजमान होऊन श्री महालक्ष्मी देवीची गावभर उत्साहात मिरवणूक काढण्यात आली होती. रथोत्सवात महिला मोठ्या संख्येने सहभागी झाल्या होत्या.

गावभर देवीदेवतांना गाऱ्हाणे घालून विधिवत पूजा अर्चा करत देवी गल्लोगल्ली भाविकांना दर्शन देत होती, त्यामध्ये भाविकांनी आपल्या घरासमोर देवीची ओटी भरून भव्य स्वागत केले. या संपूर्ण रथोत्सवात ग्रामस्थांनी भगवे तसेच विविध रंगाचे फेटे व पोशाख परिधान करून ढोलताशांच्या गजरात नृत्यावर ठेका धरला होता या मध्ये महिलांनीही या नृत्यामध्ये सहभागी होऊन आनंद द्विगुणित केला. अखेर आज या अभूतपूर्व  रथोत्सवाची सांगता झाली.