• राणी चन्नम्मानगर येथील घटनेनंतर परिसरात एकच खळबळ 

बेळगाव / प्रतिनिधी 

अज्ञात चोरट्याने महिलेच्या डोळ्यात मिठाची पूड टाकून तिचे साडेसात तोळे सोन्याचे दागिने लांबविले. राणी चन्नम्मानगर सेकंड फेजमध्ये उद्यमबाग पोलीस स्थानकाच्या हद्दीत सोमवारी सकाळी घडलेल्या घटनेने परिसरात एकच खळबळ माजली आहे. 

याबाबत घटनास्थळावरून प्राप्त माहितीनुसार, मुरुगन हे एलअँडटी कंपनीचे अधिकारी राणी चन्नम्मानगर सेकंड फेजमध्ये आपल्या कुटुंबासह राहतात. सकाळी साडेआठच्या सुमारास ते कामावर गेले असता टी - शर्ट आणि मास्क घातलेला एक व्यक्ती घरी आला आणि त्याने मुरुगन यांच्या पत्नी प्रियंकादेवी यांच्या डोळ्यात मिरचीपूड टाकून त्यांना मारहाण केली. त्यानंतर त्यांच्याकडील साडेसात तोळे सोन्याचे दागिने हिसकावून पळ काढला.

त्याशिवाय घराबाहेर पडताना धूर्त चोरट्याने त्यांच्या घराच्या मुख्य दरवाजाला कुलूप लावले. मुरुगन यांच्या पत्नीने त्यांना फोन करून सर्व प्रकार सांगितला. त्यामुळे त्यांनी लगेच घरी येऊन कुलूप उघडले. त्यानंतर उद्यमबाग पोलिस स्थानकात जाऊन तक्रार दाखल केली. यानंतर पोलिसांनी घटनास्थळी पंचनामा करून श्वानाच्या मदतीने तपासाला सुरुवात केली. याप्रकरणी अज्ञात चोरट्याविरुद्ध उद्यमबाग पोलिस स्थानकात गुन्हा दाखल करण्यात आला आहे.