मराठी भाषेच्या अस्मितेसाठी महामेळावा होणारच !

• सोमवारी धर्मवीर संभाजी चौक येथे आयोजन  

• मराठी भाषिकांनी उपस्थित राहण्याचे म. ए. समितीचे आवाहन 

बेळगाव / प्रतिनिधी  

कर्नाटक विधिमंडळाचे हिवाळी अधिवेशन सोमवार दि. ९ डिसेंबर रोजी होणार आहे. याचदिवशी मराठी भाषिकांचा महामेळावा आयोजित करण्यात आला आहे. मराठी भाषिकांच्या न्याय हक्कासाठी सोमवार दि. ९ रोजी सकाळी ११ वा. धर्मवीर संभाजी महाराज चौक येथे महामेळावा आयोजित करण्यात आला आहे. मध्यवर्ती म. ए. समितीच्या नेतृत्वाखाली महामेळावा यशस्वी करणारच असा निर्धार मराठी भाषिकांनी केला आहे. 

अधिवेशनाच्या पहिल्या दिवशी महामेळावा आयोजित करण्यात येत असून मागील अनेक वर्षांपासून ही परंपरा सुरू आहे. यावर्षीही महामेळावा आयोजित केला जाणार आहे. यासंदर्भात बेळगावचे जिल्हाधिकारी तसेच पोलीस आयुक्तांना रीतसर परवानगी पत्र पाठवण्यात आले आहे. केवळ बेळगाव वर हक्क दाखवण्यासाठी अधिवेशन भरवले जात असल्याने मराठी भाषिक आणि याला प्रत्युत्तर दिले आहे. आजवर महामेळाव्याला महाराष्ट्रातील अनेक दिग्गज नेते उपस्थित राहिले आहेत. महामेळावा  होऊ नये यासाठी वेळोवेळी आडकाठी घालण्याची भूमिका कर्नाटक सरकारने केली आहे. परंतु यावर्षी कोणत्याही परिस्थितीत बेळगाव मध्ये महामेळावा आयोजित करणारच अशी कणखर भूमिका मध्यवर्ती म. ए. समितीने सुरुवातीपासूनच घेतली होती. महामेळावा करू नये यामुळे शहराची कायदा व सुव्यवस्था बिघडते, अशी विनंती पोलीस आयुक्तांनी केली होती. परंतु महामेळावा हा मराठी भाषिकांच्या अस्मितेचा प्रश्न असल्याने तो होणारच, अशी भूमिका मध्यवर्ती म. ए. समितीने घेतली आहे. सोमवारी सकाळी ११ वाजता धर्मवीर संभाजी महाराजांच्या मूर्तीचे पूजन करून महामेळाव्याला प्रारंभ होईल. यावेळी मोठ्या संख्येने मराठी भाषिकांनी उपस्थित रहावे, असे आवाहन मध्यवर्ती म. ए. समितीच्या वतीने करण्यात आले आहे.