बेळगाव / प्रतिनिधी 

बेळगाव जिल्ह्यात शतकापूर्वी महात्मा गांधींच्या अध्यक्षतेखाली झालेल्या एकमेव काँग्रेस अधिवेशनाच्या स्मरणार्थ तयारी सुरू आहे. राज्यातील सत्ताधारी काँग्रेसने हा कार्यक्रम भव्य पद्धतीने साजरा करण्याचे नियोजन केले असून संपूर्ण शहर म्हैसूर दसऱ्याप्रमाणे सजले आहे.

कर्नाटकचे खादी भगीरथ म्हणून ओळखले जाणारे बेळगावचे गंगाधरराव देशपांडे हे १९२४ च्या काँग्रेस अधिवेशनाचे मुख्य आयोजक आणि स्वागत समितीचे अध्यक्ष होते. गांधींच्या अध्यक्षतेखाली झालेल्या बेळगाव काँग्रेस अधिवेशनाच्या आयोजनात देशपांडे यांची महत्त्वाची भूमिका होती. दि. २६ आणि २७ डिसेंबर १९२४ रोजी बेळगाव येथे झालेले काँग्रेस अधिवेशन हा भारतीय स्वातंत्र्यलढ्यातील एक महत्त्वाचा क्षण होता. या अधिवेशनात महात्मा गांधींनी खादीचा मुद्दा मांडला. स्वातंत्र्यपूर्व भारतातील ती एक महत्त्वाची चळवळ बनली होती.

या पार्श्वभूमीवर केपीसीसीचे अध्यक्ष आणि उपमुख्यमंत्री डी. के. शिवकुमार, ज्यांनी शहरात पत्रकार परिषद घेतली आणि कार्यक्रमाची माहिती दिली. यावेळी ते म्हणाले, १९२४ च्या अधिवेशनाचा अहवाल संकलित करण्यात आला आहे आणि त्याची पुनर्मुद्रित आवृत्ती गुरूवारी प्रसिद्ध केली जाईल. २६  डिसेंबर रोजी सकाळी १० वाजता वीरसौध येथे महात्मा गांधींच्या भव्य पुतळ्याचे अनावरण होणार आहे. नंतर सकाळी १०.४५ वाजता खादी मेळाव्याचे उद्घाटन होईल, असे त्यांनी सांगितले. 

"गांधी भारत" काँग्रेस अधिवेशनाच्या शताब्दी वर्षाचा एक भाग म्हणून अखिल भारतीय काँग्रेस कमिटी तर्फे २७ डिसेंबर रोजी जय बापू, जय भीम, जय संविधान अशा घोषणांचा कार्यक्रम होणार आहे. सीपीएड मैदानाच्या आजूबाजूच्या परिसराला महात्मा गांधीनगर असे नाव देण्यात आले आहे. देशाच्या इतिहासातील हा क्षण अस्पर्शित राहील, असे ते म्हणाले.

काँग्रेसच्या ज्येष्ठ नेत्या सोनिया गांधी, काँग्रेस अध्यक्ष मल्लिकार्जुन खर्गे  आणि लोकसभेतील विरोधी पक्षनेते राहुल गांधी या कार्यक्रमात सहभागी होतील, गंगाधरराव देशपांडे यांनाही प्राधान्य देण्यात आले असून गुरुवारी त्यांच्या स्मारकाचे आणि फोटो गॅलरीचे उद्घाटन होणार असल्याचे त्यांनी सांगितले.

अधिकृत काँग्रेस अधिवेशन शताब्दी कार्यक्रम २६ डिसेंबरपासून सुरू होणार आहे. अखिल भारतीय काँग्रेस  कार्यकारिणीची बैठक २६ डिसेंबर रोजी दुपारी ३ वाजता होणार आहे. २६ डिसेंबर १९२४ रोजी दुपारी ३ वाजता महात्मा गांधींच्या अध्यक्षतेखाली कामकाजाची बैठक झाली होती. त्याचवेळी ही बैठक होणार असल्याची माहिती उपमुख्यमंत्री डी. के. शिवकुमार यांनी दिली.