• शहरातील कर न भरलेल्या दुकानांना ठोकले टाळे 

बेळगाव / प्रतिनिधी 

बेळगाव महापालिकेने शहरातील कर न भरलेल्या दुकानदारांविरुद्ध आणि अतिक्रमण हटवण्याच्या कारवाईला सुरूवात केली आहे. 

बुधवारी सकाळी बेळगाव महापालिकेच्या महसूल उपायुक्त रेश्मा तालिकोटी यांच्या नेतृत्वाखाली बेळगाव शहरातील नेहरूनगर येथील आर. एन. शेट्टी पॉलिटेक्निक कॉलेज समोरअसलेल्या दत्त वडापाव सेंटर, सलगर अमृत चहा कॅफे, अंबारी ज्यूस सेंटर येथून अतिक्रमण हटवून, कर न भरणाऱ्या दुकानांना टाळे ठोकले गेले.

तसेच बेळगाव महापालिकेने कर, भाडे थकबाकी असलेले आणि अतिक्रमण करणाऱ्या दुकानदारांविरुद्ध कारवाई केली आहे. महापालिकेच्या मालकीच्या एकूण १४ दुकानदारांपैकी फक्त ३ जणांनी भाडे भरले आहे, अन्य दुकानांची एकूण ३६ लाख रुपयांची थकबाकी असल्याने ही कारवाई सुरू करण्यात आली आहे. करदात्यांनी त्यांची जबाबदारी ओळखून कर भरावा आणि महापालिकेला सहकार्य करावे, असे अधिकारी म्हणाले. 

या कारवाई दरम्यान महसूल अधिकारी अनिल शेट्टर यांच्यासह महापालिका अधिकारी आणि कर्मचारी उपस्थित होते.